انا بحكيلك ليش معترض على قانون الضريبة
يزم انا بحكيلك ليش معترض على قانون الضريبة.. وبعيدا عن المزاودات فالوطن فوق الجميع وهاي بلدنا وما نخون عهودها ، انا بحمد الله مهندس يعني نص البلد بتحلم يصير الها ابن مهندس( طبعا كان زمان).. وبشتغل بحمد الله بالمطار عند (صديقي فوزي الملقي ربنا يسلمه) ، يعني باقي النص الثاني بحلم يكون مكاني ….قلي عقلي انجن واشتري بيت طبعا بعد عشر سنوات من الشحططة من شقة لشقة فاشتريت بيت وصرت ادفع 750 دينار من راتبي لبنك الراجحي طبعا بنك مش ربوي تا تقول يا اكل الربا الله لا يقسك…كنت املك سيارة (سيفيا 2) و بعد 13 سنة من مشاوير عمان اربد المطار النقابة كربجت….فقررت تغييرها بسيارة جديدة وطبعا عن طريق البنك كمان، وبهيك طار 198 دينار يا كبير…طبعا عشان الشغل صرت (مدني) ومن سكان عمان وبتعرف همنا بهل دنيا بولد صالح متعلم يرفع راسنا ولا يخفى عليكم حال المدارس الحكومية وبعدها وباصات الكيا والشو اسمه.. فدرست الاولاد بمدارس خاصة ولانهم بحمد الله من الاوائل على الصف ماخذ عليهم خصم 40% ومع هيك بدفع 200 دينار شهري، بحمد الله املك ساعة كهرباء وساعة ماء وهاتف وهضول بدهن 70 دينار شهري… اكمل ولا احكيلك عن البنزين والاكل والشرب والدواء والنقوط بالصيف والطلات بالشتاء…يا رجل اي والله لو راتبي 3 الاف ما بكفونا..
** احكي كمان ولا اقتنعت صديقي تكون مع الوطن وضد هكذا قانون… انا موافق يدفعو عني كل هل امور وبقبل براتب 300 نيره فقط لا غير …
ملاحظة :- وطبعا هاي خارج الحسبة انا بموت على التوت الابيض والايس كريم العربي من عند (مجاهد )وهاي لحالها كسره… واهربلكم معلومة امي امد الله بعمرها متوحمه وهي حامل فيه على ملوخية ومشمس وبطيخ …وقد اثبتت الدراسات الحديثة ان تفاعل هضول بالبطن بطلع الواحد دقر وما بسكت على غش
