[review]الاثنين 7-2-2011
مذيعة تلفزيونية تتجول في ميدان التحرير وتلتقي مجموعة من النجوم الراحلين والكبار يحملون لافتاتهم ويقفون بين الشباب والمعتصمين :
– المذيعة: الست العظيمة كوكب الشرق ام كلثوم تقولي ايه للشباب والنظام ؟
* ام كلثوم: بحب أقول للشباب (انت عمري). وبقول للنظام: (يا ظالمني)..
• المذيعة : الأستاذ الموسيقار محمد عبد الوهاب تقول ايه للشباب والنظام؟
• محمد عبد الوهاب:بقول للشباب :(ردّت الروح) وللنظام: (يا وابور قلي رايح على فين).
• المذيعة: العندليب عبد الحليم حافظ؟
• عبد الحليم : بقول للشباب: (جبار)، وللنظام: (توبة) !!
• المذيعة: ونشاهد من بعيد الفنانة نجاة الصغيرة تحمل لافتة وتهتف مع المتظاهرين..تقولي إيه لشباب الميدان :
• نجاة: اقول لهم (طول عمري أحبك) ..
• المذيعة وللنظام؟؟
• نجاة الصغيرة: ( أسألك الرحيل)..
كما نشاهد على الرصيف المقابل الفنانة شادية..وها نحن نقترب من الفنانة شادية ..مساء الخير ست شادية!!
• شادية: مساء النور!
• المذيعة: كلمة تحبي توجهيها للمشاهدين؟
• شادية: بقول للشباب ( أحبكّ قوي)..وللحكومة(مكسوفة منك).
*المذيعة: الاستاذ كارم محمود؟
* كارم محمود: بقول لأولاد التحرير..(عيني بترف)..وللجماعة اياهم ( يا انا يا العزول)
المذيعة.فرصة جميلة جداً نلتقي الفنانة الكبيرة ليلى مراد..بتحبي تحكي حاجة للجماهير العظيمة ؟
• ليلى مراد : بقول للشباب : (يا أعز من عيني)..وللحكومة: (سنتين وأنا احايل فيك) وللبلطجية: (اتمخطري يا خيل).
• المذيعة..على الطرف الآخر من ميدان التحرير ..يمسك فريد الأطرش عوده ويغني..دعونا نقترب أكثر من ملك العود، استاذ فريد بتحب تقول ايه في الأجواء العظيمة دي:
• فريد الأطرش: بقول لاولادي في الميدان (جميل حمال)…وللجماعة اللي هناك: ارجوك ارجوك (اديني ميعاد)!!
المذيعة تقترب من السيد مكاوي..تعرّفه بنفسها ثم تقول له : تقول ايه للشاب المصري وبتقول ايه كمان للحكومة.
• سيد مكاوي: بقول للشباب المصري: (أوقاتي بتحلو..بتحلو معاك )..وبقول للحكومة (بلاش معاندة)
في هذه الأثناء يتجمع حولها مجموعة كبيرة من الفنانين الكبار فتأخذ كلمة واحد فقط لكل واحد منهم : عادل أمام تفضل: (رسالة الى الوالي)، احمد زكي: (ضد الحكومة) ، اسماعيل ياسين(حيجننوني)، عمر الشريف (ليلة الجنرالات)، فريد شوقي (بطل للنهاية)..
المذيعة أخيرا اعزائي المشاهدين ، أشاهد الفنان الرائع محمود عبد العزيز يجلس وحيداً بعيداً عن زملائه الفنانين : في إيه استاذ محمود؟.
• محمود عبد العزيز : (خلطبيطة)..بصراحة (خلطبيطة)..
• ملاحظة: كل عنوان يقع بين قوسين هو أسم أغنية مشهورة او عمل سينمائي مهم للفنان المذكور.
احمد حسن الزعبي
ahmedalzoubi@hotmail.com
