بل ما اكثر راتبه
يا اخي انا مستغرب من هظول اللي بصيبوا بالعين ما بتشاطروا الا على الناس الغلابى والطفرانين اللي مثلهم….والناس اللي معهم مصاري وبلعبوا بالمصاري لعب ومعهم سيارات آخر موديل وعايشين بقصور ما حدا يصيبهم بالعين…. طيب ليش العين ما بأثر فيهم، يتساءل واحد حسود بطس طس ومشهور بالعين والحسد ؟؟؟؟
في صديق الي راتبه يا دوب ال 500 دينار، بدفع منهن اجرة بيت وقسط سيارة وفواتير واولاده بالجامعة والمدرسة.. ولما واحد بسأله عن راتبه بصير يرجف من الخوف، وبخاف يحكيلك قديش راتبه خوفا من العين والحسد….
على شو بدهم يحسدوك خيوه….؟؟؟
والا اللي معه سيارة كيا موديل 95..مهنتكه بتلاقيه ماخذها عن طريق البنك او بايع مباريم مرته او عامل جمعية مع نسوان الحارة، بس تخرب او يصير معه حادث بسيط، بقولك والله عين وصابتني… والله الناس بحسدوا الكلب على عافيته… على شو بدهم يحسدوك خيوه.. سيارتك قديمه مفرهلة.. واشي طبيعي انها تخرب، اصلا مليح منها اللي بعدها ماشية..؟؟؟
والا اللي معمر غرفتين وصالة وحمام وبرندا، اما عن طريق البنك او جمعية او اقساط او طلع مع قوات حفظ السلام…. بس تسأله عن داره، بقولك قول ما شاء الله يا اخي، قال شو خايف عليها من العين… بحسسك انه معمر قصر او فيلا!!
يزم على شو بدهم يحسدوك؟؟؟
هاظ لو تعرف انه مدير شركة الكهرباء اليوم تعين براتب 13 الف دينار شو بدك تقول ساعتها؟؟
يالله طسوه عين خلينا نشوف مواهبكوا…
وقولوا معي (بل ما اكثر راتبه) بلكي طسيناه عين وقضينا عليه من مرة..!
