مشان الله سامحني، توبة اعارضك
يا جماعة مين بعرف عنوان جورج قرداحي، تبع برنامج المسامح كريم ؟
بصراحة بدي اياه مشان يصالحني مع هالواحد اللي صارله سنتين محوربني وما بحكي معي بس عشان مرة اختلفت معه بالرأي بقصة، رغم اني كنت مؤدب وودي بطرحي معه، بس الله يسامحه ما بطيق حدا يقوله انت غلطان او انه اللي حكيته جانبك الصواب في بعضه،
منها الواحد بطش برى وبغير جو على حساب برنامج المسامح كريم، ومنها بطلع قدام الجمهور وبصير مشهور، ومنها كمان منتصالح معه ومنخلص من هالقصة، ورايح اتعهدله قدام الجمهور واقوله “خلص ببزق التوبة ولا عمري بناقشك بأي موضوع، حتى لو قلتلي الشمس بتشرق من الغرب غير اقولك اه انت بتحكي صح، اي انت اصلا عمرك ما غلطت، واني يومها كنت غلطان معك ،وصدقني من هظاك اليوم واني ضميري بوجعني وما بعرف انام ، ارجوك سامحني بتوب ،،وبعطيها شوية دموع مشان يكون المشهد عاطفي اكثر، والكاميرا بتصير تركز على دموعي الهارات من عيوني، وبصير الجمهور كله يعيط وهيكا والجو كله عاطفي وحزين، وبعدين بقوم بعبطه قدام الجمهور ومنروح سوا مع بعض،
بس يا رب يسامحني وما يخذلني ويخذل جورج قداحي واللي عادة بنجح بمهمته الا اذا … ”
وبعدين هاي فرصة، انها البنت الحلوة هاي ام طاقية واللي دايما بتيجي راكبة على بسكليت تيجي هون وتدق عليه الباب ويطلع عليها، واولاد الحاره يلحقوها وهيكا ،،
بس يا خوفي يكحشها على الباب ويوئد محاولتي وهي لسه بعدها في المهد، لاني بعرفه عقله خزق وما بطيق الذبانة تهدي على خشمه،
عاد بالرغم انه لما بتشوف كتاباته عالفيس بوك بتقول ما شاء الله شو هالحكيم هاظا، بتحس وكانك قاعد بتقرأ لافلاطون او ارسطو، بس على ارض الواقع الامر خلف خلاف !!
واخيرا بقول يا رب تسامحني، بس لاني خالفته بالرأي مرة، وهاي توبة ولا عمري بعيدها يم !!.
