اللهم لا حسد / م . بلال الشرمان

اللهم لا حسد
اطفال اليوم عندة عشرين محطة لافلام الكرتون ، ولا يمكن تخلص فترة الاطفال وما بكرروا حلقة او يعيدوا مسلسل كرتون ، كلة جديد ، مش مشكلة الدنيا حظوظ ….

مش مثلنا وايامنا ، الواحد يضل يستنى بفترة الاطفال من الصبح ، متذكر كان التلفزيون يفتح الساعة اربعه ( متخيل حالي بحكي عن دكانه ) المهم اول ما يبلش توم وجيري ، يضلوا كل يوم يعيدوا نفس الحلقة واحنا مجبورين نتابعها عشان بدنا نتابع الكابتن ماجد وما بدنا تروح علينا لقطة احراز الهدف ، لانة صارلنا بنستنا فيها من يومين او ثلاث لما خبط الفطبول هذيك الشوتة ، ومن يومها والفطبول طاير بالهوا ، وبسام هذا صاحب الكابتن ماجد ( حريف لعب مثل الكابتن ماجد ) كان يضل فاتح ثمة ومستغرب ليومين او ثلاث من قد ما هي الضربة قوية

احكي بعدنان ولينا، يا سلااااااااام على الابداع، اصلا لازم يترشح لجائزة الاوسكار قد ما هو قوي ، مخلص صديق الحيوان ، هاي الدراما ولا بلاش……

كان يقهرني الرغيف العجيب ، رغيف خبز ومدحبر دحبرة ، يعني يقسم من راسة عشان يطعم مش عارف مين ، طيب شيل على جنبك ربطة خبز ووزع على كيفك ، فعلا بتستاهل شو ما سوا بيك قط البكتيريا ، بس يا عمي لازم اتابعه كمان عشان احضر الفيلم الرئيسي ، بل وسباستيان ، بس كان محيرني هالقاروط لانه دايما شايل الجرو الصغير بجيبته ( كان اسمة بوجي) ، بل( الكلب الكبير ) احسن واقوى مثل الاسد قد ما هو كبير….

مضينا كل طفولتنا ونص فترة الشباب واحنا نستنى توم يوكل جيري ، وما زبطت ، تخيلو تستنوا اشي عشرين سنة وبالاخير ما يزبط ، وكانت كمان استنى انة كونان يكبر ، وبسمع لحد الان بعده صغير ،كنت استنى ماوكلي يلقوة اهلة ويلبسوة ايام البرد ( المشكلة ما كان يبرد او يرشح ) ، مره طلعت نص كم اجرب مثل ماوكلي ، يومها رحت بغيبوبة اسبوع من البرد
المهم ، اولاد اليوم مكييفين …..