تُجار السوق السوداء
كان عندنا بيت من الحجر جنوبي القرية الحصن كان بيتنا اربع غرف غرفتين بينهم باب مساحة الغرفة عشرة بعشرة وغرفتين اقل مساحة وحوش كبير وبير وفرن طابون مقسوم قسمين قسم فرن وقسم مخزن لزبلة الفرن وكان عندنا خُم كبير للجاج وحواكير حوال الدار نزرعها خضرة بامية وبندورة وفجل وبصل وكوسا وكان عندنا طواقي للحمام
والحصن ام البوابير بوابير الطحين من هنا بلشت الحكومات تشتغل فينا اول مرة وزعو علينا قمح مجانا مونتك طول السنة وبعد كم سنة وزعو علينا طحين امريكي هدية من الشعب الأمريكي الحنون وهو في الحقيقة من الحكومة وليس من الشعب والناس كيفت طحين حيله قوي ومن هنا بلش انهيار القُرى في الوطن كل الوطن بطلنا نزرع ونهتم بالوطاة صرنا اتكاليين الغرب درسونا وعرفو اننا شعب بحب البهرجة والجخة والمظاهر الكذابة دوانا عندهم وما قصرو فينا واحنا ارض خصبة للكسل بدنا همبرقرقر واكل مطاعم
من سهل حوران القمح نسوي منه فريكة وسميدة وكُبة وشعيرية وبرغل للمجدرة وزلابية ومن العنب نسوي تطلي وخبيصة ونبيد وزيت بلادنا يا ما احلاة ونربي جاج
ومن قصل القمح نسوي طباق ملونة والتبن نطعمه للغنم
وكل بيت فيه عنزة او بقرة منوحة تطعمنا حليب ولبن ولبنة وجميد وسمنة بلدية
كل هذا زمان لما كُنا محترمين الأرض نحبها ونعشبها ونزرعها ولما كُنا محترمين حالنا نوكل من تعبنا قبل الحكومات تتأمر على شعوبها وتقبض ثمن جهلنا وكسلنا وانحدارنا لتهددنا برغيف الخبز بعد ان فقدنا الأرض والكرامة ليتحكم بلقمة خبزنا تُجار السوق السوداء
