#يوميات
بعد ما قطعتني السياره وانا نازل ع وسط البلد قرقرت اطلع بتكسي …
وأكثر من ساعه وانا بالشارع وكل التكاسي بمرو وبرفعوا ايديهم وبسلمو علي من غير حتى ما يطلعوا علي! صرت أسأل حالي معقول اني صرت ( معروف إلى هذا) الحد …
بعد شوي صف تكسي جنبي قلي وين رايح يخوي؟ حكيتله وسط البلد …. حكالي طيب يلا سلام ….
انا مش عارف شو القصه قعدت امشي( تسالونيش كيف هاي) وانا ااشر وهم ياشروا وبلش الموضوع يقلب جد وصرت اغلي بعد ما صرت ماشي 2 كم مشي سريع زي تاعون الماراثون وصارو أجري زي خف الجمل والشمس حاسها بتلطوش فيي كفوف وانا امشي واسبسب واتفتف بالشارع لدرجة واحد بحكيلي بالله يخوي ما انتو الكاميرا الخفيه قاعد تتخوث عالعالم …. تخيلوا !؟
قلت في عقلي يا ولد احسن اشي ارفع البنطلون شوي عن أجرك زي الأفلام الامريكيه بركن الله اغريت حدا وطلعني معه …
بصراحه انا بس رفعت شوي البنطلون رديت نزلته لأنه انا ما استحملت المنظر لأنه فعلا مش منظر …
قلت بعقلي خليني أغني أغنية عبد الحليم نمشي نمشي خليني أنسى لقيت نفسي انقطع من التعب يخوان وعبدالحليم الي جواي صار صوته زي جورج وسوف بعدين راح اصلاتن الصوت كله ….
المهم وانا( قاعد امشي )انتبهت على حجي واقف بده تكسي قمت شديت بالمشي ووقفت أبو عشره متر لقدام عشان بس يطلع اطلع معه انشالله رايح عجهنم ، وفعلا وقف شبيب للحجي وركضت عالسياره وارتميت عالبوز وقلتلهم بعرض النور خدوني معكو …
وين رايح …. انا رايح عجهنم وين مابدك عوسط البلد !؟
قال اطلع بس بدون عداد يابا …
طبعا الشوفير ماخد زاويه وقاعد بين الكرسي والشمعه وماطط أيده عالستيرنغ وبدخن وبلعب بالتلفون وكأنه كاين يسبح بمسبحه حاطها اسواره و عركاية الكرسي في كاسة قهوة من عند عمكو أبو صالح وشكلها رقم عشرين من الصبح والجير طبعا عادي ….هاظ كله اه كله !!
ما علينا الشوفير ريحة عرقه بتكتل طالعه معبقه منفجره دخلت على خلايا الأنف والدماغ عملتلي انقطاع بالنفس مؤقت مع التهاب في الأعصاب دائم وصار نفسي كله زفير ويا دوبك شوية شهيق … (مش هيك كان اسمهم بالمدرسه)
الحجي كبست معه وسأله هاي يا بني السياره أكمن حصان ؟
قاله هاي 59 حصان يا حج ….
قله والله يا بنيي شكلهم كاينين 60 !
حاله معقول يا حج !؟
جاوبه الحج اه معقوله شكله في حصان ميت منهم وريحته طالعه ….
طبعا انا هاتك مش قادر أتنفس ومش قادر اضحك وصافن فسالني شو مالك انت كمان صافن فحكيتله مع كل هالسرعه وال multitasking الي انت عامله بقول أبصر يعرفو يغسلونا ولا لا بعد الموته معك ….
بديش احكيلكو وصلنا واجيت انزل واحاسب … يعني كل المشوار عالعداد من بيتي بطلع يا دوبك ليرتين ونص قلت بزت عليه ليره لأنه تقريبا نص الطريق ….
انا بعرفش انه اجت وقفتنا عند صحابه الشوفيريه الي بوسط البلد …
انا هيني صحيت والحمدلله … ولقيت عمو الحج عندي بالغرفة بستقبل الزوار وداير باله علي وجايبلي قهوه من الدار ….
شوية كسور بس اعذروني اذا في أخطاء عيني اليمين مسكره والجبيره بايدي اليمين بتحكني 🙂
#مالها_نمره_11
#انزل_كعابي_مالها_رياضة_المشي_في_عمان
#ايهم_ايوب
