وفد عراقي يطلع على تجربة #ديوان #الخدمة المدنية الأردني

عبدالمجيد المجالي

تفاصيل اللقاء:
#الوفد #العراقي : عيني حنا جايين نتعلم من عندكم، شلون تشتغلون؟
جماعتنا : أول شي لازم يكون عندكم ديوانين خدمة.. واحد للشعب الخمة.. شو ما زاد عندكم وظائف مش ولا بد وزعوها عليهم، وواحد لأبناء وأحفاد رؤساء الوزراء والوزراء وعلية القوم، هذا ما في تنافس ولا دور، بدكم تخلقوا الوظائف خلقة… حرام الواحد فيهم يتخرج ويقعد بالدار اسبوع
الوفد العراقي: سمعنا المواطن عندكم يلحقه دور بعد ٢٠ سنة أو أكثر من التخرج، يكون وقتها معه ضغط وسكري وزهايمر وناسي شو درس.. ليش تتأخرون هيك ؟
جماعتنا : لعاد شو بتفكروا ؟ الشغل النظيف بده وقت !
الوفد العراقي: صحيح نسبة #البطالة بين شبابكم ٥٠٪؜ ؟
جماعتنا : صحيح ، الله يلعن الكورونا بس، صدقونا قبل الكورونا شبابنا ما كانوا يقعدوا بالبيت
الوفد العراقي : من كثر الشغل ؟
جماعتنا: لا والله من كثر ما بدوروا ع شغل
الوفد العراقي : طلع الحال من بعضه، وطلعنا في الهم سوا
جماعتنا : شو جاب لجاب؟ انتوا بتواجهوا تحديات مثلنا ؟ تعرضتوا لمؤامرات قدنا ؟ عندكم لجنة لتحديث المنظومة السياسية؟ عندكم هيئات مستقلة قدنا ؟ بتعرفوا تعملوا مصفوفات حكومية زي الي عنا؟
الوفد العراقي : لو نعرف نعمل مصفوفات كان ما بعنا نفط، طيب كيف نأمن وظائف للناس؟
جماعتنا : اعملوا مثلنا، كل ما الناس تطالب بالوظائف وتحسين الظروف الاقتصادية إحكولهم: نحن ندفع ثمن مواقفنا من القضية الفلسطينية !