سواليف – رصد
توفيت ليلة أمس الاحد الطالبة #سلسبيل_أبوالشوك داخل #سكن_طالبات #جامعة_الحسين_بن_طلال في #معان .
وحسب شهود عيان وطالبات من داخل السكن أن الطالبة لفظت أنفاسها الأخيرة بينهن بعد أن تقاعسن #المشرفات في السكن بإسعافها، حيث طالبن زميلاتها بالتحقيق في وفاتها .
وكتبت إحدى زميلاتها في السكن منشورا عبر صفحتها الشخصية في فيسبوك قالت فيه :
#سكن_الحسين
أبشع موقف ممكن تشوفه بحياتك..
تموت زميلتك بالسكن قدام عيونك ..
بس لانك عايش بمكان م الك فيه حرية وبتعامل معاملة للأسف معاملة “حيوانات ” .
انت م الك الحق بهاد المكان تمرض او تتعب بعد الساعة ٦ ونص .
وم الك حق تعمل اكل بعد الساعة ١١ .
ما الك حق تفرح بنجاحك او تخرجك نهائيا .
حدودك بتنتهي داخل ٤ حيطان ، وعايش تحت رحمة ورأفة مشرفات .
ما بعرف شو الاساس ال بختارو فيه المشرفات..
بحيث إنهم يكونو صاحبات أحنّ قلب ورأفة بالدنيا .
كائنات ممكن تموت قدامها ويكون ردهم: عادي خذي “كبسولات ” ،،
مش فاهمة سكن فيه مليون روح كلنا بنعيش تحت إشي إسمه ” كبسولات “..
بس لأنك مش بين اهلك ولأنك بالغربة بدك تمرض ووتوجع وتسكت .
مش من حقك تطلب إسعاف او تروح ع المستشفى ل أسباب غير معروفة .
مقهورة كثيير ،، لانه فوق كل الضغوطات ال بنعيشها بالغربة بنشوف أشياء أكبر من عمرنا وأكبر من طاقتنا..
بتكون بعمر ال ٢٠ ، ٢١ و ٢٢ وبتشوف زميلتك بتتوجع قدامك وبتموت للأسف .
متخيلين مشهد تشوف صاحبتك بتتشاهد وبتاخذ آخر نفس من الدنيا قدامك !!!!!
مش عارفة شو ذنبها لتموت بهيك عمر ! ومش عارفة شو ذنبها بدال النص ساعة يلي بتطلب فيها من المشرفات مساعدة كان المفروض بهاد الوقت بتتعالج !
ليش ما في ممرضة بكل سكن !
وانت مش طالع بإيدك شي !
لمتى الإهمال فينا وبأرواحنا !!
لمتى نضل نتعامل بطريقة عاطلة بس لانه احنا بغربة !
شعور كثير عاطل ، من أسوأ المشاعر ال ممكن تمر فيها بحياتك .
الله يرحمك حبيبتي ويغفرلك .
سلسيبل ابو شوك من سكن بوابة الفتح خريجة على الفصل الثاني في ذمة الله💔
من جهته قال د.محمد جرار ال خطاب الناطق الاعلامي لجامعة الحسين بن طلال ، أن هذا الكلام عار عن الصحة والرجاء عدم تناقله انطلاقا من الموضوعية الصحفية التي يجب ان تسود في اي خبر صحفي.
مهما كانت الظروف هل يمكن ان يتصور العقل بانسان أن يشاهد انسان غيره يموت امامه ويقف ساكنا.
ما حصل وجود سيرة مرضية لدى الطالبة المرحومة لا نستطيع الحديث عنها كون الجهة المختصة بالتصريح عنها وتحديد سبب الوفاة هو الطب الشرعي.
وسنقوم باصدار بيان تفصيلي بسبب الوفاة عند صدور تقرير الطبيب الشرعي الرسمي.
كل الاعتزاز بكم وبموضوعيتكم ومهنيتكم العالية.
