هجوم حاد على الرزاز بعد تهنئته بيوم المرأة

سواليف
آلاف التعليقات والردود على تغريدة الرئيس عمر الرزاز ومنشوره في صفحتيه على فيسبوك وتويتر ، بعد ان نشر مهنئا المرأة الأردنية بيوم المرأة العالمي .
وكنب الرزاز في صفحتيه على فيسبوك وتويتر مساء امس الخميس …
المرأة الأردنية قوية، ومعطاءة، والمستقبل الأفضل لا يكتمل من دون حضور فاعل للنساء، والسير إلى الأمام يكون باستثمار قدراتهنّ وطاقاتهنّ.
كلّ عام وأنتنّ بخير.

وبعدها اشتعلت الردود الهجومية الغاضبة على منشوري الرزاز ، توضح حال المرأة الأردنية في ظل الحكومات المتعاقبة ، تاليا بعضها :
** شحدتو الزلم ودرتو عالنسوان
٩٠ بالميه من النساء في مجتمعنا ما بفهمن بالتجاره اقنعتوها انها ممكن تصير مليونيره بقرض ب ٨٠٠ دينار عشان تسجنوهن وتشحدو عليهن

**اي مرأه بالضبط … المرأه الاردنيه 3 انواع
النوع الاول غارمه بالديون وحاليا بالسجن . النوع الثاني تخرجت من الجامعه منذ عشرات السنوات وتنتظر هي و اولادها خبر التعيين … والنوع الثالث تتعين قبل تخرجها من الجامعه باعلا الرواتب وكل الامتيازات متاحه لها …

** ألامهات الاردنيات تلتاع قلوبهن على فلذات اكبادهن الذين امضوا اكثر من اسبوعين تحت البرد الفارس طليا للعيش للتوظيف وانتم اذن من طين واذن من عجين

** بالأمس كرمتم حليمه ونسيتم المرأه الأردنيه والدتي زوجة شهيد وشقيقة شهيد…عمركم ماسألتم او تذكرتم نسلم منكم واحنا بخير

** اتفق معك دولتك ❤ وكل عام ونساء العالم بالف خير …. لكن اتمنى معرفة السر بقوة وعطاء لينا عناب قبل تعيينها سفير باليابان 🙄🙄

** المرأة الاردنية قوية بفضل وستر ورحمة رب العالمين . لو عليكو بتسجنوا الاطفال وما بتقصروا ..ووللا النساء زمان انسجنوا.

** لا يصلح العطار ما افسد الدهر … يا ليت نقدر نأمن مستقبل الشباب العاطل عن العمل من سنوات طويله والذين فقدوا الأمل بالحياة والمستقبل ومن ثم نفكر في قدرات المراه وتوظيفها لمستقبل الاردن

**ابشرك…المراة الأردنية الأصلية…. مطلوبه للتنفيذ القضائي… لأنها ماخذة قرض تشغيلي ب ٥٠٠ دينار او الف….
هو ظل مراة اردنية……
عرفها لنا.

**والله دولتك المره عافت جوزها وولادها من قلة الشغل والمصاري ورح تفقع من القهر
المهم حبيبتنا حليمه المرأه الحديديه تكرمت ومنها باذن الله بنستمد قوتنا

**والغارمات بالسجون معاليك ماذا نقول لهن كل عام وانتن بالسجون بخير والأرامل والمطلقات ولى زي ماقلت معاليك للحديث بقيه والشعب ينتظر بقية الحديث أن بقي للحديث بقيه

** وكأنها تهيئة لخلافتك بأمراة … وهذا فعلا ما اريد … ان تكون رئيس الوزراء امرأة … لعلها تكون اكثر منكم رجولة …

**نصهن مطلوبات للتنفيذ القضائي بفضل المجهود الرائع للحكومات (ولك من الفضل نصيب).
ونص البنات ما حدا دق باب دارهم لأنه الطفر عنوان عقدك الاجتماعي الجديد (يعني أمهات المستقبل بانقراض).
طبعا المتزوجات مهددات بالطلاق برضه من الطفر (ولك فضل في ذلك).
دولتك تويترك و فيسك نوع من أنواع مسببات الألم ممكن تعفينا منهن بكفي نتحمل خيرات ضرائبكوا (وبدون نفع يرجى).
#حنيتك_طلعت_صنف_مضروب

** دكتور قرفنا الحكي بدنا واقع مقبول نقدر نعيشه …..شو بتعرف دولتك عن المرأه الي خارج عمان وبالمحافظات المسخمات 🤔

** عشان هيك عينت عناب سفيره باليابان هذا تحفيز المراة . طيب سؤال شو في تعاون بينا وبين اليابان احنا بنستورد منها بس شو بنصدر الهن هل كوكب اليابان بحاجه النا

**آخر الزمن صار اسم المرأة الاردنية
” غارمة” وبدل ان يكون مكانها بين ابنائها صار مكانها السجن .
هل تقصد هذه المرأة؟؟ أم تقصد إمراة أخرى؟

** عشرة سلندر الله وكيلك
صارت جعفر من وراء سياسات
الدولة… والله الوحده بيهن
رايح بخاطرها تجيب اقنينة عطر

** لقد طفح الكيل من التنظير نريد شيء على أرض الواقع
كفى استخفاف بعقول البشر
أن صمتنا على ضلمنا وقهرنا ليس لكم

**المرأة الاردنية الحقيقية مهددة بالسجن بسبب القروض …وللاسف الأم المثالية التي تكرم لا تمثل الاردنيين ولا قيمهم…
الام الاردنية دورها يصل ل2000 في ديوان الخدمة المدنية…وفي المقابل بنت فلان او فلانة قفزاتها مكوكية في المناصب…

** يا سيدي المرأة الاردنية اثقلت كاهلها الديون و الهموم و انعدام وجود ثغره ترا من خلالها بصيص امل يلوح في الأفق .
لا هي قادرة و لا زوجها و لا ابنها و ابيها و لا اخيها من الخروج من دوامة الألتزامات المادية و الصعوبات المعيشية من طعام و شراب و كهرباء و تعليم و علاج و كل اساسيات الحياة اصبحت شبه مستحيل تحقيق ولو بعض منها.

**الحمد لله
إحنا في الأردن الوحيدون إللي لما يفشل مسؤول
نروح نغير موقعه
لينا عناب من فشل في وزارة السياحة إلى سفيرة في اليابان

** سأضيف هذا المنشور الى ملف هجرتي الى كندا على امل أن ينظر إلي القنصل بعين الشفقة وكيف انني عشت 34 عاماً مع هذه الكائنات

**إذا همك المرأة الأردنية شو السجن قديش فيه غارمات و مظلومات شوف أبواب المساجد إللي مليانة نساء يطلبن قوت اليوم لأولادهن!

**بدي احكي لدولتك انت ما زهقت من الحكي واي مرأه اردنيه اللي بتحكي عنها اللي عليها قرض ويلا اللي محبوسه ع قرض ويلا اللي مطلوبه ع قرض ارحم الشعب الاردني خليه الله يرحمك

** ٧٥٪ منهن محبوسات ع قرض المرأة
١٥٪ منهن طالبات عليهم قيود بسبب قرض الطالب
٥٪ منهن موقعات شيكات وكومبايلات.
٣٪ عايشات مستورات
٢٪ عم بحتفلوا بيوم المرأه

** أي مستقبل دولتك
مش لما حدا يشوف الغارمات بالسجون
استثمار طاقاتهن بالسجون
دولتك السير الى الامام باحترام وتقدير ودعم المرأة
مش توفير شركات نصب واحتيال للزج بهن في السجون

**مشكلتك ومشكلة جمانه غنيمات انكم مفصومين عن الواقع!… لا والف لا اتعين لينا عناب احتراما لامهات الأطفال، وضعف الأداء في وزارتها، ولتغيير الوجه التي مللنا منها! وانت ما بتعرف انه الأم الأردنية بطلت قوية صارت مكسورة ومنتهيه انت بوادي والبلد بوادي

**انتم لستم بحاجه لقدرات من المرأه فقط
بقدر ما تريدون محو وطمس هوية المرأه الحقيقيه من إنشاء جيل صالح
والجيل الصالح ما بينشأ من نسوان بتشتغل بالكازيات وغيرها

**في اشياء كثير احسن نركز عليها دولتك
بدل ما تيجي منصه قطريه وتوخذ اصحاب الكفاءات
يصير عنا هالاشي وننهظ بالشباب مي يكونوا عبء ع الدوله
الواحد بس يتخرج بتبلش قدامه الدنيا تسود وتسكر
دولتك اش رايك نرتب موعد مع بعض واحكيلك شغلات كل الي حوليك ما بحكولك اياه
ساعه بس وبنخلي قتيبه يبطل يهاجر او بتحكيلي هاجر معاه

** كل عام واحنا متوظفات،، كل عام والنا حياة كريمة .. كل عام واحنا مو محتاجين حد
كل عام وأبوي بخير ومو متداين فلوس عشان ايجار البيت
كل عام وامي مو محتاجة تاخذ من جارتها ١٠ليرات لاخر شهر
كل عام وحضرتك مطلع شوي بحاجة الشعب الفعلية 🤚🏻

** اخيرا دولتنا اعترفت بذلك ولكن ما فائدة الاعتراف ان كان لا يوجد شي ببلادي يدعم المرأه……
خريجه منذ سنين وممتحنه ومقابله ع الفاضي ….. وكل هالبلد واسطااات ومحسوبيه والشهاده ببلادي الكل يتحسر عليها ……

**بدهن يتزوجو البنات صار نسبة العنوسة مرتفعه شغلو الشباب وارفعو الاجور خليهم يقدرو يتزوجو مو موظف براتب ٢٢٠ دينار كيف بدو يتزوج افهم

**بكفي استثماركوا لطاقات وقدرات لينا عناب سفيره للأردن باليابان اليوم …
بلكي على الله بدها تنقل لنا التكنولوجيا والتطور من اليابان…

**المراه الاردنيه مش نساء المجتمع المخملي الي بياكلوا بشوكه وسكينه معك ع نفس الطاوله
المراه الاردنيه هي الي ما درست بسبب وضع اهلها المادي السيء
المراه الاردنيه هي الي بكت دم ع ابنها الشهيد لانه ما عمره ابن وزير استشهد لنحكي يعني
المراه الاردنيه هي الي يوم بتطبخ فيه دجاجه لاطفالها بتخلي ميه الطبخ لثاني يوم تعمل عليه شوربه
المراه الاردنيه الي بتفكر الماجي دجاج ونسيت انو في اشي غيره
المراه الاردنيه هي الي بتنغصب ع زواج بس عشان اهلها يخف مصروف البيت عليهم
المراه الاردنيه هي الي ممنوع تحلم او يكون عندها طموح واخرها ع بيت زوجها
والله يا دوله الرئيس الا تتحاسبوا عند ربنا ووالله احنا خصامكم يوم القيامه
الله لا يباركلكم ولا يبارك عليكم بحقنا

**تحت اسم الاستثمار النساء الاردنيات يُستنزفن لا يستثمرن حاليًا
و إهمال للشباب وصل لمرحلة عدم الرضى بالحال
#إهتمو_فينا_بدل_ما_تعايدو_علينا

**معاليك اكتر مراه انهانت ودخلت السجن المراة الاردنيه الي هي امي وامك واختي واختك من شركات قروض ربويه لمتنفذين وقال تعاله بعد بسمةالله الرحمن الرحيم (كبر مقتا عند الله ان تقولوا مالا تفعلون) صدق الله العظيم

** مزبوط..بعلامة كرمتو مغنيات ونسيتو امهات الشهداء..وخليتو الغارمات مطلوبات وبالسجون..وغير الي اهاليهم دفعو عليهم دم قلبهم عشان يتعلمو وياخذو شهادات ويقعدو بالبيوت وبدل دورهم ما ينزل بديوان الخدمه بالعكس برتفع…يزم انداري رب العباد لمتى بده يضل ساكت عن مسؤؤلين هل البلد…كبر مقتا عند الله ان تقولون مالاتفعلون….كبر مقتا عند الله….وما بعد ذلك غير الطوفان على قولة سمو الامير الحسن.

**انوثتهن راحت بهيك مجتمع فاشي طاغي وسياسات ظالمة وسالبة للحقوق
من المستحيل يعيشن حلم او راحة او حياة رفاهية ولو ليوم واحد
لا اللي متجوز قادر يبسطها لمرته
ولا الواحد قادر يعمل شي يرفه عن عيلته فيه

**اقول نساء الاردن صارن زلم من وراك وراء الي قبلك يوم المره تشتغل على تكسي ولا باص كيا ولا تشتغل بكازيه وغيره وغيره الهن الله نساء الاردن

** مهو دولتك البلد بخير و الشعب مرتاح و عايشين برفاه و استرخاء و ما علينا ديون و كا اشي متوفر، هو بس ،
موضوع المرأه الي عامل قلق في البلد

انت بس خلي الناس تعيش طبيعي و المرأه ما بدها منك اشي

**المرأة الاردنية اصبحت مترعرعه في السجون او (خريجة سجون) بسبب القروض والديون المالية التي اوصلتها الحكومة الاردنية لها.