اعتذار
نصلي جماعة؟
بشوف اذا فضيت برنلك بنروح نصلي سوا هاظ إذا فضيت.
صلاة السنة؟
مهو عنا مشوار بعد الصلاة يمكن ما نصلي السنة “مهي سنة مش فرض”.
أخذنا قرض من البنك ، اه بفوائد ، بدنا نعمل عرس لأخوي احتمال كبير يكون مختلط.
اه وبدنا نحط أغاني .
مهو بدنا نفرح فيه.
ما برضي الله ؟
يزم شو بدك ياهم يحكوا علينا الناس معقدين!
لا تخاف “ان الله غفور رحيم”.
في رمضان صليت ٨ ركعات تراويح ويمكن كمان ٢٠ ورحت كمان أقيم الليل.
صلاة الفجر؟
مهو ورانا دوام ثاني يوم ولازم أنام منيح مشان هيك صليتها بس صحيت ع ٩.
الواحد يمكن يضطر انه يكذب شوي في التعامل مع الناس هو مش يكذب شوي شوي بس مهو لولا الكذب ما بتمشي أمورنا “لازم تكون ملحلح” هيك كانوا الكبار يحكولنا واحنا صغار .
حجاب!
يزم البنت لساتها صغيرة سنة ٢ جامعة بس تتجوز جوزها بحجبها.
صلة الرحم؟
بس في العيد .
والله الواحد ما بفضى شغل ووجع راس بس ما تنسى ع موعدنا بكرا بدنا نطلعلها للمباراة قبل بساعتين ع الملعب بدنا نحجز مكان زي الناس نحضرها فيه.
القرآن الكريم؟
الحمد لله أنا منزله برنامج على تلفوني بقرأ منه في كل رمضان وبختمه كمان.
راحت عليك مبارح أحضرت ٤ أفلام مرة وحدة مهو الواحد زهقان بده يضيع وقت.
الدخان والأرجيلة حرام!
مين حكالك انهم حرام ؟
هاتلي آية قرآنية أو حديث صحيح انذكر فيه الدخان والارجيلة!
يزم الأعمار بيد الله
جارنا الله يعينه مكسور عليه ٦ شهور اجار دار.
بس الحمد لله دعيتله من كل قلبي وأنا في فرنسا لما طلعنا أنا والعيال نغير جو والله مخنوقين.
الله يعينها جارتنا الختيارة كل يوم الصبح وأنا قاعد في سيارتي وبشرب قهوة بشوفها بتأشر للسيارات مشان يوصلوها معهاش مصاري المسكينة الله يعينها.
الله يعينهم هالمرابطين اللي في المسجد الأقصى كل يوم اليهود بضغطوا عليهم اعتقالات واقتحامات وتهديد ودفع غرامات جد الله يعينهم بس كله هاظ أجر وثواب عند الله، توكل بطيخ؟
هالبطيخة جبتها اليوم من السوق شغل مستوطنات اشي ع كيف كيفك مهو بطيخ البلد والله ما بتاكل .
بدي أعمل سهرة شباب مشان ابني نجح في التوجيهي بدي اشوفله واسطة بركن توظف ، لا الكهربا بنمد من أسلاك الحكومة، مهو كلها بتسرق يعني هي وقفت علي!
ع العموم الله يطهر بلدنا من الفاسدين تعون الواسطات أكلوا البلد ملاعين الوالدين.
الله يهدي البال
أُعذرنا يا الله أننا نعبدُك على هوانا لا كما أمرتنا..
#اعتذارات
#سامي_السلوادي
