نظرية أبو عودة النسبية لحل مجلس النواب…!!
يا ابو عودة يا حبيبي روح أشتريلك لبسه جديدة…. آخر الأسبوع عندك مية مناسبة… ودشداشك لونه حّل على جلدك.. من يوم الغدا تبع جيزة أخوي وانت لبسه… والله الناس صارت تعرفك من الدشداش بطلت تميز ملامح وجهك… صار الدشداش شكلك…أسكتي أسكتي بلا كثرة حكي.. والله أنتي فاضية أشغال… ما ضل غير أروح على الكوافيره واشتري كندره كمان… يا همالالي بدك تدفعني مية ليره.. شو ماله الدشداش ماشاء الله عليه…اه صحيح والله مبين زي صورة الأشعة وأنت ماشي بس يضرب عليك ضو الكشاف بسهرة الشباب.
يازلمه بكره الناس بتيجي عليك وانت شايف النواب بلفوا على الناس…. يعني والله ما بصير منظرك هيك مش حضاري…. اها اها وقفي عند هل الكلمة… مش حضاري…!! يا بنت الناس خافي الله ليش انا قادر اغطي مصاريفكوا… يا بنت الناس… مناسبات.. وأمراض وأدوية… مدارس وأعياد… رمضان وعزايم…يابنت الناس أنا ما بدي اغتني ولا أصير مليونير بس بدي أنستر والراتب يكفيني…اه والله أجتني فكرة مرتبه ليش مايكون شعار النواب.. (من أجل راتب يكفي المواطن…) والله شعار حلو… اصلاً اذا راتب المواطن صار يكفيه أنه يعيش مستور.. بنكون وصلنا للي بدنا اياه…بكون مجلس النواب ضغط على الحكومة لمصلحة المواطن… وبكون مجلس النواب مع الحكومة ويقطع ايدي الفاسدين.. وكمان بكون مجلس النواب يسهر على تشريع القوانين للنهوض بالبلد… يعني رح نكون بألف نعمة والراتب بكفيني… مشان هيك رح أنتخبهم.
(صوت أم عودة من أخر الصالون…) أبو عودة قوم غسل وجهك وامسح برابيرك.. يا زلمه شواخيرك وأصله لدار ابو خلف… شكلك كاين تحلم.
youseftalab@yahoo.com
