موظوع تعبير عن البيظ
كامل نصيرات
زمان لما كنا زغار ما كانت كراتين البيظ متوفره زي هالأيام..كنا نشتري البيظ بالبيظة ..مرات بيظتين مرات ثلاث بيظات أو أربعه..المشكله وين لما نتهاوش أنا واخواني عليهن ..ناس بدو البيظ سلق وناس بدو إياه قلي ..
البيظ هسا صار حبطرش..بس مش زي بيظ زمان..بيظ زمان كان بيظ محترم ..بيظ طالع من جاجه بنت عالم وناس..هسا والله إني شاك انه الجاجه بنت شوارع و مدلعة ومرات أشك أنو الجاجه بتعلك و حاطه سنسال ..وحتى مرات أشك بالديك نفسو ..مش الديك تبع زمان كان صوته يهدر هدر لما يصيح..طيب وين راح ..حتى يجوز إلي أكثر من خمسه وعشرين سنه ما سمعت صياح لأي ديك..إلا بالتلفزيون وباغنيه هاي فيروز الديك أذن كوكو كوكو..
طيب ما دامنا بطلنا نسمع صوت الديك من وين بييجي كل هالبيظ..وين تختفي الديوك وتشتغل كل هالشغل..جد اشي يمخول المخ..ويحط العقل بالكف و يخلي اللي ما يشتري يتفرج..
عارف فيه ناس كثيرين رح يحكو شو هالموظوع التافه اللي تحكي فيه..والله ما انت لاقيلك شغله..ومعهم حق لأنو موظوع البيظ بالذات ما بيفقس معهم ولا داخل في مزاجهم..مع إنو موظوع مهم مهم كثير كثير والله..
صحيح اللي ما يفهم بالبيظ ولا يمكن يفهم كيف الدنيا ماشية حوالينا..يا ناس ويا أوادم إحنا أمه تمشي ع بيظ ع بيظ ع بيظ..افهمو عاد ..
