معك القيادة العامة للقوات المسلحة الاردنية…
الو السلام عليكم يمه، انا صدام يمه…
هلا يا ميمتي يا حبيبي لويش اتأخرت تامنك اتصلت وطمنتني عليك؟
معلش يمه اتأخرت على الباص وبتعرفي مجمع الزرقاء وازمته الفجر، وظليت استنى تمنه وصل الباص الثاني وتوني وصلت الوحدة
الله يصلك برحمته يا ميمتي، وشلونك يا حبيبي …
ما لحق يصير علي اشي يمه ماليش يوم واحد غايب عنك
والله يا ميمتي اليوم بسنه، بعد ما استشهد ابوك بالكرامة ما الي غيرك
الله يرحمه يا يمه، توكلي على الله وان شاء بعد رمضان بطلع القرض وبتجوز وبخلف عشر عيال يظلوا يونسوكي بالدار
يا يمه هالغرفة والصالة شو بدها تسعني…؟ والا تسعك انته و “منال”….؟ والا تسع اولادك العشرة…. ضحكتني الله يسعدك يا ميمتي
خلص لعاد يمه بنخليهم تسعة …. وبنرفع شمعتين من الجنب ولوحين ثلاث زينكو وربك بيسرها، الله ما يحرمني منك يا يمه ويقدرني على رد جمايلك، ياما جعتي عشان اشبع، واصقعتي عشان ادفا، واشتغلتي “اذنة” مدرسة بالنهار وخياطة وام بالليل…
خلص يا ميمتي اتكملش الحمد لله، الله عوضني بدال تعبي وشقاي وشفتك عسكري لابس “البوريه” مثل ابوك…
يا “ام صدام” تونا كنا بنظحك لويش العياط عاد هسا، بالله عليكي لا تعيطي خلي الواحد صيامه متقاظب
من الفرحة يا حبيبي من الفرحة، مش مصدقة انك كبرت وبدك تتجوز…
يمه بحكي معك بعدين بلاش نخلص رصيد الزلمة ، سلمي على منال وقوليلها برن عليها بس اشحن..
الله معاك يا ميمتي ويبعد عندك اولاد الحرام ويسخر لك جنده ويجعلك بكل طريق صديق….. مع السلامة.
شكرا يا اخوي يا “جريس” غلبتك وطولت عليك بالمكالمة بس امي ما بتطمأن الا لما احكي معها
ولا يهمك خذ راحتك والرب ما يحرمكوا من بعض، القايد طلبك عشان اتأخرت روح “لقي” عن راسك عنده
والله ما هو بيدي…شو اساوي القرية ما بيهاش غير باص واحد بطلع لمجمع الزرقاء وبدة اقل اشي ساعتين حتى يرجع، واذا بدي اجي بسيارة طلب بقظيها لآخر رمضان على الحديدة… وغير باص الزرقاء للرويشد، ومن الرويشد لمخيم “الركبان” بباص الجيش… يعني من دارنا لهون بدي نص نهار
الرب يعينا يا اخوي يا صدام حالنا احسن من حال هالمساكين اللاجئين بالمخيم شوف كيف حالتهم ، الرب يجيرنا من الحروب ويديم علينا نعمة الامن والامان .. امين … امين … امين.. قوم خلينا نشوف شغلنا …
الو … السلام عليكم …. والدة الرقيب صدام محمد عبدالله؟
ايوه انا
معك القيادة العامة للقوات للمسلحة الاردنية…
لا تكمل يا بنيي لا تكمل .. لا تكمل … بس خذوا بثاره و بثار ابوه بعديها زفولي خبر استشهاده…..
