الوضع العربي مخزي جداً جداً جداً!
والدافع الوحيد لللكتابة هو القهر.
الحملة اللي شنتها مجموعة من الدول العربية على دولة قطر بحجة انها تدعم الاٍرهاب وأنها حليف قوي لاسرائيل ما هي الا مهزلة تضاف الى مهازل ” عرب العصر الحديث”، يعني بالله الدول هاي ما فيها ولا واحد عاقل من اصحاب القرار ! او يمكن العاقل صوته مش مسموع او محبوس او مهاجر!
التناقض الاول، كيف يعني بدك تحارب قطر وتقطع علاقاتك معها لانها حليف لإسرائيل وبنفس الوقت والسبب الثاني انها تدعم حركات المقاومة اللي هي ضد اسرائيل.مش عارف!!!
التناقض الثاني، ليش بتحارب قطر كحليفة لإسرائيل والحكومات العربية قاطبةً اللي هي نفس الحكومات اللي قطعت العلاقات، همها الاول والوحيد التطبيع مع ما يسمى بإسرائيل. والغريب بالموضوع، وحدة الصف العربي فجاءة ضد قطر (طبعاً كنت بتمنى انه الصف توحد زي هيك أيام غزو العراق). يا زلمة في دول مش موجودة على الخارطة أصلاً صار بدها تقطع العلاقات مع قطر! يعني اصحاب القرار العربي “بالعربي” لا هم شايفين شعوب بعينهم ولا بطيخ والسبب واضح “الكرامة” وكرامة المواطن العربي أصبحت من أبخس الأشياء في زمن التضخم.
ترامب و على الرغم من موقفي الغير مؤيد للحاكم الامريكي، الا انه بمقابلة تلفزيونية قبل اكثر من عشرين سنة قال انه لو صار رئيس الولايات المتحدة راح يجبر دول الخليج على الدفع، لأنهم على حد تعبيره عايشين زي الملوك بسبب أمريكا فلازم يدفعوا “الاتاوه” وهذا ما تم بالفعل لانه في فرق بين رئيس ممكن يعمل المستحيل لارضاء الشعب عشان يضل حاكم. وبين زعيم عربي بتصرف كأنه الدولة عبارة عن مزرعة والشعب عبارة عن
خدم.
انا ما بتهمني قطر ولا اَي دولة اخرى، انا بهمني بكرة بس ابني يسألني ليش هيك؟! اعرف شو أجاوبه. او اذا سألني وين كنت لما هذا الحكي صار، اقدر أدافع عن نفسي.
