#مش_مزبوط..
#خاص_سواليف
مقال الأربعاء 25-2-2026
#احمد_حسن_الزعبي
كان أول الواصلين إلى #المجمع_التجاري ، طوابق متعدّدة ، #عيادات متنوعة، و #مكاتب محاماة، وصل إلى باب #العيادة التي قدم لمراجعتها،فوجدها ما زالت مقفلة ، بدأ يقرأ #الإعلانات في موزع الطابق الطويل على واجهات العيادات المجاورة من فوائد #الرضاعة_الطبيعية ، و #موانع_الحمل ألآمنة ، ونصائح لمريض السكري في الصيام، وأخرى لعمليات سحب “المية البيضا”..سمع بابا يُفتح..التفت إلى العيادة المعنية كانت #السكرتيرة تفتح الباب للتو..
أضاءت المكان ،رشّت معطر جو وقامت بتشغيل #الكمبيوتر..اخذت اسمه وكتبت له بطاقة مراجعة..بعد نصف ساعة حضر #الطبيب ، ثم توافد بعض #المراجعين..نادت السكرتيرة : راضي عايش سالم ” #أبو_يحيى ” تفضل عموه..
دخل أبو يحيى غرفة #الطبيب وبيده ملف تحاليل وصور و” سي دي”، انشغل الدكتور بكتابة ملاحظات على دفتر جانبي،قبل أن ينظر بوجه المريض ثم سأله ..خير يا حج..
أبو يحيى- والله يا دكتور حاس حالي “مش مزبوط” ، و” #العقل_الجمعي ” قاعد بيوخذني وبيجيبني ، كل ما أعمل ” #استدارة_تكتيكية ” بالفراش بحس كأنه في ” #كتلة_حرجة ” عند خاصرتي، برجع بعمل لحالي ” #إعادة_تموضع ” ، وفوق هاظ صاير معي #سيلان بالـ” #جيوسياسي ” ومعاطسة ليل نهار ، حتى كتفي اليمين صاير فيه ” #مواربة “..
فتحولي علبتين “#سرديّة ” عالفطور كان انت ذقتهن أنا ذقتهن..أي شي بوكله بحس انه مرّ..بقول لحالي معلش يا ولد “كلّ مر سيمرّ”..وبالليل لما أحط رأسي ع المخدّة بحس بضيق نفس وكأني بدي “أطلع من #عنق_الزجاجة “..بطلت أستطعم بالحياة..و”مزاجي الشعبي”..منكّد..
الدكتور – طول بالك يابو يحيى ..إن أجمل أيامك لم تأتِ بعد..
أبو يحىي: شو أطوّل بالي..بتصدّق أني بخلي ” #الباب_موارب ” مشان اذا صار لي اشي يحسّوا عليّ الأولاد..
الدكتور – طيب ما راجعت #مستشفى حكومي؟
أبو يحيى- حاولت أراجع مستشفى حكومي ، ما رضيوش يدخلوني ، أنا اشتغلت بستنجي بالجامعة عشرين سنة ومتقاعد ومعي هوية ، ورجيتهم “الهوية الجامعة” تبعتي قالوا ما بتمشي لازم تأمين صحي..ابن اخت عديلي مساعد فني اشعة بمستشفى خاص ، قلي وديلي ملفّك كامل خلي زميلنا الدكتور يعمل لك “دراسة اكتوارية” لحالتك..رن علي مبارح وبقلي ، احتمال ” #حصوة ” عالأرجح حصوة، بدك تشوف أخصائي للحصوة ، أو تعمل “تحليل إحصائي” للــ”……” سكّرت الخط بوجهه لما صار يخبّص بالحكي..
الدكتور – طيب بعدين؟
أبو يحيى – كل مالني برجع لورا..حتى #أم_يحيى مبارح بتقلي مالك تقول صايبك ” #تقهقهر_بالنيولبرالية “؟..تخيّل حتى أم يحيى اللي ع البركة صايرة تحسّ انه معي “تقهقر بالنيو ليبرالية”..
الدكتور- عندك حساب عالفيسبوك؟
أبو يحيى- عندي
الدكتور- لازم أكشف ع حسابك أطّمن انه ما عند تضخّم “ببوستاتك” وباقي الأمور هينة ..اطلع عالتخت وقرفص..
أبو يحىي- الفحص بيفطّر؟
الدكتور- هو بس بيفطّر؟..
Ahmed.h.alzoubi@hotmail.com
