مسبحة الكترونية
وكعادة معظم الجارات قبل أذان المغرب ( بحوالي الساعة) وبعد الانتهاء من طبخ الإفطار أو قبل وضع اللمسات الأخيرة عليه ، تجتمع هذه الجارات في المنطقة المحايدة والأكثر ظلً بين البيتين (بالفَيّات) أو يكون الاجتماع بمطبخ إحدى الجارات التي لم تنهي من عملية الطبخ بعد ( يعني بتكون طبختها شوي دسمه… واقعة عندهم)…
أم خليل رنت تلفون على جارتها صبحيه بعد ما أستعوقتها : وينك يا بنت الحلال؟ وبالفعل بعد بخمس دقائق طلعت صبحيه على مقر القعدة والاجتماع ، طبعاً أم خليل وصبحيه كل وحده منهن لابسه يانس الصلاة وكل وحده كمان لابسه بإصبعها الشاهد مسبحة الكترونية (مثل حمام السلام ) …وخذ كلام من اللي يعجبك …مرة يحكن عن الأزمة الخليجية (لمدة دقيقة) ومرة يسولفن عن تربية الأولاد وغلبتهم (رؤوس أقلام) ،عدا عن كلام الطبخ والطبخات والحلويات والعصائر… ، وبعدين يدخلن للموضوع الرئيسي والذي يأخذ المساحة الأكبر من الكلام، اللي هو نكد العمة و غلبة الزوج ، غير الانتقادات والتعليقات على بعض الجارات ( اللي مش عاجباتهن..مثل فلانة ما بتعرف تطبخ ، وفلانة بتجيب طبخ جاهز عامله حالها كُبار ..وفلانة بتطلع تقرأ قرآن بالبرندة مشان يشوفوها الناس…..) ، وطبعاً وهن يحكن نازلات كبس بالإبهام على المسبحة الالكترونية ، وكل ما ينتهي موضوع ، وقبل ما يدخلن لموضوع ثاني، صبحيه تسال أم خليل: أكم تسبيحه صرتي عامله ؟….أم خليل: والله فوق الألفين تسبيحه…وبعدها يرجعن للكلام والانتقاد والقيل والقال … وقبل الأذان بدقائق بحكن: خلينا نلحق نسخن الإفطار قبل ما يسرقنا الوقت ، والمشكلة بعد ما شَلّن معظم الناس بالكلام والانتقاد ،بترجع أم خليل تسأل صبحيه : بأي جزء صرتي ؟ صبحيه بتقول : بالجزء العشرين المرة الثانية…أم خليل طيب أكم تسبيحه صرتي عامله بالقعدة؟ ..صبحيه: فوق الأربع آلاف تسبيحه…أم خليل : ما شاء الله ، وين أنتي و وين إحنا!!!!
