سياسه ” ممعوطه ”
انا : السلام عليكم
ابو خلدون : عليكم السلام ، كم طير بدك !
انا : الله لا يهينك وزنلي ٤ طيور ييجي كل طير ٢ كيلو
ابو خلدون : هذووووول يا سيدي ٨ كيلو و٢٠٠ غرام ، اذبحهن ؟
انا : اه اذبحهن ابو خلدون
ابو خلدون : بسم الله الله اكبر ، يا عموه هيه ايران شو مصلحتها بسوريا غير انه متفقين مع اميركا من تحت الطاوله ينهوا تواجد السنه .
انا : والله يا ابو خلدون على قولتك مبينه القصّه .
ابو خلدون : خليهن شوي يتصفّى الدم مليح .
انا : مو مشكله عمّي
ابو خلدون : انا سمعت انه فيه قواعد حربيه بريطانيه عالحدود المصريه
انا : اففف والله بجوز
ابو خلدون : اصلخهن صلاخه ولا بالمعاطه
انا : بالمعاطه اذا فيه مجال .
ابو خلدون : طيب اردوغان لويش مكبريته الناس ، زلمه ما بيطلع عن خط امريكا وشو اردوغان وشو مرقته ، والله قد حاله لويش
انا : بس يا ابو خلدون اردوغان بكفي انه قدر ينهض بالاقتصاد التركي ويعمل من تركيا دوله منافسه .
ابو خلدون : فيه وحده من القوانص رميتها لأنها زرقا وما بدك اياها .
انا : هههههه اه طبعاً شيلها .
ابو خلدون : تقسيم السودان بتفكر ما فيها مصالح لدول عظمى
انا : صدقني تحليل منطقي عمي ابو خلدون
ابو خلدون : اقطّعهن ؟
انا : يا ريت اذا ما فيها غلبه
ابو خلدون : شوف الدول المحترمه مثل فانزويلا والاكوادور كيف قدروا يواجهوا تحدياتهم الاقتصاديه ، لو برويز مشرّف عنده مخافة الله كان الباكستان مثل هولندا .
انا : برويز مشرف استقال عن مبدأ ، بضل أفضل من غيره .
ابو خلدون : وشو مدريك يا عمّوه خليها بالقلب ، طلعن ب١٢ ليره و٥١ قرش ، مسامحك بالقرش
انا : تفضل ابو خلدون ، اشكرك .
كم نعشق الحديث في السياسه ، نتحدّث بلكنه سياسيّه وكأنَّ كلَّ واحدٍ منّا وزير تنميه سياسيّه سابق ، نعرف خفايا كل دول العالم ونحللها سياسياً من الارجنتين الى سويسرا ، أما اذا قلت لأحدهم عن مفهوم الفساد في الأردن يقول تلكَ الجمله المعهوده : ما بحكي بالسياسه .
عند شراء الباذنجان تكلّم لي ابو لطفي عن ميزانيّة ساحل العاج ، وفي الدكّان المقابل اشتريت باكيت دخّان ” مهرّب ” لم يدعني صفوان الّا وحدّثني عن تاريخ البرتغال ولماذا استعمرت الموزمبيق ، حتّى يوسف ابن عمي علي يتكلم لي يوميّاً عن احتضان دولة اليابان لأطفالها المبدعين ويرى أنّهُ احتضان سياسي بحت ، كانَ يختتم كل جمله بقوله ” المخفي أعظم يا زم ”
دجاج ابو خلدون يصيح داخل الأفقاص ، يا تُرى هل كانَ يطالب بالحريّه السياسيّه لدواجن المزارع ، اللهُ أعلم فأنا لا أُتقن لغة الدجاج الّا على مائدة الطعام .