كيف بتنام وجارك جوعان ؟؟؟

بسم الله الرحمن الرحيم
كيف بتنام وجارك جوعان ؟؟؟
نهيل الشقران

– شو مالك مهمومه والبين طاسّك يا بنت
– والله يابا منا عارف شو بدّي أحكيلك لأحكيلك
– ولك احكي يا بنت مالك؟ خوفتيني عليكي، شو في ؟
– لا تخاف يابا، بس اليوم شفت شوفه الله يجيرنا !!!
– شو شفتي بالله ؟ هاتي لشوف .
– شفت جارتنا أم العبد ونا مروحة من الجامعه هي وولادها بدوروا بحاويات الحارة على أكل أو بقايا أكل
– باااطل ، ولك شوب تحكي إنتي؟؟ من عقلك ؟
– والله يابا هاض اللي شفته بعيني ما حدا قلّي
– يا عيب العيب ، بتعرفي ؟ صحيح يابا الحقّ علينا احنا الجيران لاوم نتفقد بعضنا ، ونشوف مين محتاج ونساعده قدر الإمكان ، لأنه رسولنا الكريم قال :” ما آمن بي من بات شبعان وجاره جائع إلى جنبه وهو يعلم ”
وهاي صار عندنا علم ، وأنا بفرجيهم أخوتها الهمل اللي بعيد ربنا ما حدا بفقدها بخمس ليرات
– شو بدّك تعمل هسا يابا؟
– هسّا بدي أشوف وجوه الحيّ ونعمل صندوق للتكافل بالحيّ ونساعد المحتاجين أمثال أم العبد
– يابا هاي الشغلة بتطوّل
– لا يابا ما رح استنى الصندوق هسا ، بدي قبل هيك أشوف هالخيرين ونجيب مونه لأم العبد وولادها وبعدين بفرجها الله
– الله يفرجها يابا
– آمين يا بنيتي