رسالة من خرّيج من كلية الشريعة الى الدكتور أمجد قورشة

سواليف – رصد

من صفحة محبي د . أمجد قورشة على الفيسبوك
ننقل الرسالة كما نشرت على الصفحة وكتبها الطالب باللهجة المحكية

الطالب الخريج الوحيد في كلية الشريعة الذي استطاع إرسال رسالة ورقية إلى الدكتور أمجد قورشة عن طريـق محاميه الأُستاذ محمود الدقور
واستطاع الدكتور أمجد قورشة الرد عليه وإرسال رسالة خاصه له ..

إلى أمجد قورشة أو الدكتور أمجد قورشة أو الأب أمجد أو كل شيء ممكن ينكتب قبل كلمة أمجد
اليوم أنا تخرجت من الشريعة ..يعني اليوم تخرجي كان .. أو مبارح أو قبل مبارح لانو ما بعرف متى رح تقرأ الرسالة ..
مين أنا ؟
آسف دكتور نسيت أعرفك عن حالي ، معلش بتعرف خريج ومعجوق ،اه الحمد لله طلعت براءة الذمة بس ضل شغلة وحده لازم أعملها وهي هاي الرسالة عشان أطلع من الكلية وضميري مرتاح
أنا يا دكتور طالب شريعة تخرج وبدل ما حمل شهادة تخرجه ليفرح فيها أمه حمل صور لأمجد قورشة ، كان بده يحكي للناس كلها إنو أنا تخرجت بوجع بألم ، تخرجت شريعة وهمه بحكولي بكره حيصير فيك زي اللي صار معهم ليش يعني يا حبيب إمك بشو إنت أحسن منهم اه ؟
بكره بزتوك بالسجن ويحكوا عنك كلام ما فكرت فيه .
بكرة بيجردوك من حبك لوطنك اللي حكيت عنه أيام وسنين ونشدت له موطني آلف مرة ..ومرة
ومرة لما دمعتك عينك عشانه .. ولما رفضت كل المنح والعقود اللي بتحكيلك اطلع اطلع من هالبلاد وخليها لغيرك
بكرة ببعدوك عن مرتك وولادك..
ويمكن ما تقضي العيد معهم ويمكن أشياء كثيره
قديش يا دكتور طالب الشريعة بنظلم ..آآخ يا دكتور أنا موجوع أُقسم بالله موجوع
من أول ما دخلت الشريعة وكانوا يحكولنا ما تدرسوها ..مرة بكتبوا عنا إنّا ناس بتكره البلد ومرة بحكوا إنّا داعش ..
مين الداعش يا دكتور .. احنا ؟ هو اللي بحب البلد بطلع داعش
علمتني يا دكتور أُنو أفكارنا ما في إشي ممكن يقيدها .. وأحيانا القيد نفسه بحمل معنى الحرية
أنا بعرف إنو نفسك عزيزة يا دكتور وما بترضى حتى وإنت في السجن إلا وتتطمن ع أخبارنا كلنا
بديش أطول عليك بعرفك مشغول دايمًا..
الأيام حتعدي وبتنسى هاي الرسالة .. بس أنا ما رح أنسى شو يعني أتخرج والدكتور اللي علمني حب البلد .. حطوا بسجون البلد
ما سألتني ليش قاعد بكتبلك ؟
هدول شباب وبنات الشريعة طلبوا مني أكتبلك رسالة عشان ندعمك ونحكيلك إحنا معك وهالقصص الطويله حكتلهم إنو الدكتور ما بده حدا يرفعه همته بس ما صدقوني ..وأنا ما طلع معي إلا هيك والله يا دكتور مش عارف شو اكتب ..
ع قولتك خليها ع الله ..
صح .. الشريعة قايمة قاعدة وكل طالب بس ينحكى اسمك هيك أبصر كيف بصير ..
بس الطلبة فيها أقوياء والله وبنخافش عليهم ..وبحبوك يا دكتور كثير ..ويمكن عيونهم تغيرت عن آخر مرة شفتهم فيها
أنا بقلك وخذ مني توجعش راسك ..بكره بس تيجي ع الكلية إن شاء الله وتضلك سهران فيها تقرأ وتدرس .. رح تعرف كل إشي
قاعه 15 اشتاقتلك
واحنا كمان
احكيلنا إنك منيح ،عشان كل اشي يرجع أحسن
سلام عليكم ..
‪#‎qourshah_logout‬
‪#‎freedomforqourshah‬
‫#‏حكاية_نشمي‬
‫#‏الحرية_لأمجد_قورشة‬
‫#‏اعتقال_أمجد_قورشة‬
‫#‏لا_تسجني_ع_رأي‬
‫#‏الحكي_مش_جريمة‬
‫#‏كلنا_أمجد_قورشة‬
‫#‏الحرية_للدكتور_أمجد_قورشة‬
‫#‏كلنا_مع_قورشة‬
‫#‏أمجد_قورشة‬
‫#‏علمني_أمجد_قورشة‬
‫#‏علمني_الدكتور_أمجد‬
‫#‏كلنا_مع_الدكتور_أمجد_قورشة‬
‫#‏بس_بحكي‬
‫#‏قورشة‬