بسم الله الرحمن الرحيم
عادات يجب أن تتغيّر – 1
نهيل الشقران
أم علي : يبو علي ، أميت بدك تجوّز هالولد ؟ صار عمره سبع وعشرين سنة والله حرام
أبو علي : ولك يعني أنا مش حاب أجوزه ؟ مهو أنا مستعجل أكثر منك تا أشوف خلفته قبل لا أموت
أم علي : بعيد الشر عن عمرك ، أنا عارف إنّك متلهف أكثر منّي
أبو علي : أنا بإمكاني أخطبله من الصّبح ، بس قوماكي توابع الخطبة والزواج اللي بتكسر الظهر
أم علي : يا رجل مثله مثل هالناس اللي بجيله وخطبوا
أبو علي : أي هو أنا لو راضي عن عاداتهم كان ما شاورتك وخطبتله بدون ما تقولي
أم علي : عادات إيش يبو علي ؟
أبو علي : الخطبة بدها حفلة للعروس ، وكأنها حفلة عرس ، وبدها ذهب بالشيء الفلاني ، وإذا طوّلت الخطبة لازم ابنك ما يروح ع خطيبته وإيده فاضيه ، كل ما راح بده يجيبلها هديّة بالشيء الفلاني .واحنا ما معنا نلحق على هالشغلات الفاضيه
أم علي : طيّب مهو كلّ الناس هيك ، هو بس ابنّا ؟
أبو علي : ولا تنسي قبل العرس بثلاث أيام الناس بتظل رايحه جايه ، وهاض بكلّفنا إشي كثير
ويا حبيبي ليلة الحنّا ، بتكلفنا مصاري كثير ، لأنه إذا ما عملنا عشا وكباب للحاضرين ، بننفضح بالبلد .
أم علي : والله إنّك صادق ، بس شو العمل ؟
أبو علي : كمان بعد الزواج ، طلعونّا بسولافة الصّبحة ، اللي ساووها وكأنها أكبر احتفال بالبلد ، وبتكلّف أهل العريس وأهل العروس مبلغ وقدره
أم علي : والله إنّك صادق ، بس برجع بسألك شو العمل ؟
أبو علي : أنا شايف إنّه كل هالعادات ما إلها لزوم ، وأنا رح أبدا بنفسي وبإبني ونتخلّى عنها
أم علي : بدك الناس توكل وجوهنا ، يا فضيحتي بين نسوان الحارة ، وقراباتي كمان
أبو علي : إذا ظلينا نحسب حساب للناس ، عمرنا ما بنغيّر ولا بنتغيّر وحياتك .
أم علي : لعاد توكّل على الله وأنا معك
أبو علي : هي كبدّي ياكي ، توكلنا على الله ، شوفيله بنت حلال ترضى بللي اتفقنا عليه
