طِفل يترجّى عودة أبيه المُسافر
♥️♥️ قصة كتبها بالعامية/ أمير شفيق حسانين♥️♥️
👈 يا جماعة بعرفكم بنفسي😊 أنا إسمي سُفيان♥️ إسمي حلو صح؟!♥️أنا عارف 😊 حلو علشان بس إللي سماني كدا ، هو #بابا حبيبي الغالي 😊♥️ وعلي فكرة👌السنة دي أنا دخلت أولي إبتدائي♥️ يعني كبرت شوية أهوو 🤣 أنا بس عاوز أقول لكم حاجة زعلتني شوية👌ممكن 😊♥️؟!
👈 النهاردة وإحنا في فُسحة المدرسة😞 الواد شِهاب صاحبي سألني : هو أبوك #مسافر🤔 يا سُفيان ولا إيه 🥺؟! هو إنت فاكر شكله كويس 🤔 ليه مش بيجي المدرسة 🤔 ، ويزورك زي بابا 😞؟!
👈 رديت علي شِهاب صاحبي 🥺 وأنا زعلان أوي من سؤاله😞، وقلت له: آه فاكر بابا طبعاً 😞 بابا في الصورة عندنا في البيت 🥺 دا صورته متعلقة في أُوضة الجلوس عندنا🥺 شَعره جاي كدا علي جنب🥺 مُبتسم وبيضحك في الصورة♥️ بيضحك عشان يفرحني 😊 بس مش بيتكلم 🥺علشان محدش بيتكلم في الصورة 🥺ماما قالت لي كدا يا شِهاب🥺 وكمان تيته إحسان🥺 وجدو عبده ، إللي هو أبو بابا 🥺 .
👈 بصراحة أنا صدقتهم يا شِهاب😞 ..علشان حاولت كتير أكلم بابا في الصورة 🥺 كان مُبتسم بس 🥺لكن كلام مفيش🥺 قلت لماما نزلي صورة بابا … عاوز أبوسها .. بابا وحشني💔 .. بابا حبيبي .. أكيد جاي من السفر قريب .. مش عاوزه يشتري لي أي ألعاب😞 .. مش عاوز حلويات😞.. مش عاوز فُسحْ.. عاوز بس أحضن سي بابا كتير .. علشان دمه خفيف😊.. وبيقول نُكت بتضحكني ، بابا بيكلمني في التليفون لما يكون فاضي 😞.
👈 والله بفرح لما بابا بيتصل علي النت ويسأل عليا♥️بفرح خالص 😊 مش بابا يا ناس.. دا هو الحب كله .. بابا بيقول إنه مسافر .. علشاني😞 .. مش فاهم معني الكلمة دي😞 .. إزاي مسافر عشاني .. وأنا عايش في مكان🥺 .. وهو عايش في مكان تاني خالص🥺 .. بعيد خالص.. بشوفه كل سنتين🥺 آخر مرة شُفته أنا كنت عندي أربع سنين 😞.
👈 بس برضو صورة منورة أُوضة الجلوس♥️ منورة بيتنا .. أنا حفظت صورة بابا ♥️ بابا كل ما يِوحشني .. أجري علي صورته …وأقعد أكلمه🥺 .. بس برضو مش هيرد 😭 لأن الصورة مش بترد 😞 ولا لها صوت ولا حركة 🥺.
👈 شِهاب صاحبي ، كلامه صح👌عشان صُحابي ، كل واحد فيهم باباه ، بيزوره في المدرسة ، ويهزر معاه♥️وبيشتري له حلويات وهدايا ♥️ إلا بابا مش بيزُرني🥺 عشان مسافر💔 .. نفسي مرة واحدة يزرني في مدرستي💔 نفسي أمسك إيده وأنا رايح المدرسة 🥺 وأقول لأصحابي دا بابا الحقيقي .. مش بس إللي في الصورة😭.
👈 في مرة أخذت صورة بابا 💔 .. عشان أصحابي يشوفوها🥺 قلت لهم دا بابا💔 .. قعدوا يضحكوا عليا😞😞 .. ويقولوا دا صورته يا سُفيان .. لو دا باباك بجد👌كان إتكلم في الصورة🥺 ورد عليك😭😭!!.
👈 يومها رجعت لماما 🥺وقعدت أعيط من كلام صُحابي😭 ، ورحت أشتكي لماما سوسو💔 .. قعدت سوسو أُم قلب طيب♥️، تعيط جانبي.. وتحضني♥️ وتقول لي باباك جاي قريب ياسُفيان ، يا روح سوسو♥️ واصلاً زي كل مرة👌 بابا مش بيجي .. شكل سوسو بتضحك عليا😞 علشان أنا صُغير ، ولسه في أولي إبتدائي 😁.
👈 أرجوك يا بابا .. لو مسافر عشاني .. كفاية كدا وتعالي 💔 .. عاوز أشوفك كل يوم ..كل ساعة😭 .. كل دقيقة .. عاوز أنام في حُضنك💔.. مش بس حُضن ماما سوسو 💔.. عاوز أشوفك بتضحك بجد .. مش بس في الصورة😭.
👈 يارب إحفظ بابا علشان خاطري🤲 علشان خاطري يارب🥺🤲 يارب إحفظ صورته إللي أُوضة الجلوس🥺🤲 عشان ضحكته الحلوة فيها🥺وعشان بشتكي لصورته لو حاجة زعلتني 🥺 بابا وعدني .. إنه جاي قريب🤲 .. وهيكون معايا علي طول.. بابا حياتي… وماما عمري💔 .. يارب أسعدهم🤲 .. عشان أبقي فرحان علي طول😊 بابا أنا بحبك أد الجنة🤲 أنا مستني حُضنك يا أحلي بابا 😭💔🙏.
