الصورة تعبيرية
#سواليف – رصد
تداول ناشطون عبر مواقع التواصل الاجتماعي #رسالة وصفوها بالموجعة من #شاب_أردني ، شرح فيها أوضاع #الشباب_الأردني في ظل انعدام #فرص_العمل و #البطالة وتأخر سن الزواج وضعف #الرواتب ان وجدوا عملا ، حيث لا يكفي المدخول المصاريف الشخصية للشاب ، بحيث صار الشاب غير قادر على #الزواج وتكوين أسرة والانفاق على الزوجة والأولاد .
وتاليا نص الرسالة :
رسالة بدي أحكيها وأمري لله
بدي احكي باسمي وبإسم أغلب شباب المملكة احنا شباب عالأغلب ملامحنا ملامح ختيارية بكل صدق وامانه بحكيها، اقسم بالله الأغلب وانا أولهم ختيرنا وما معانا نتزوج ولا موظفين ببلدنا، والي موظف منا راتبه لا يزيد عن ال 400 ليره بدبر حاله بواسطة بدخل عالجيش غير هيك ما فيه امل لأي وظيفة إلا اذا رحمة ربنا نزلت عليه واشتغل وسلك حاله او تعين بدوائر حكومية أو في القطاع الخاص ..
المهم رسالتي للأهالي جميعاً ولأهلي أولاً لا تحسسونا بالفشل، لأنه والله الي فينا مكفينا ، اقسم بالله يا جماعة الخير يا دوب أطلع مصروفي اليومي ، انا شو بختلف عن ابن #وزير ولا ابن #مسؤول ولا ابن موظف كبير ، انا شو ذنبي اذا بلدي الي بفديها بروحي مش معطيتني ابسط حقوقي وهي حق العمل والحياة الكريمة ، مش حرام انا وغيري وكل الشباب ما معانا نتزوج !
عمري 26 سنة وغيري عمره 30 واكثر وبعدو اعزب ، اه نفسي اتزوج ويكون عندي زوجة وبيت ، مثلي مثل غيري ، اقسم بالله شايلين هموم جبال ما بتتحملها ،،
اقسم بالله منحب هالبلد بس برضه النا حق نعيش فيها حياه كريمه ، وفيه مين مسؤول عن هالموضوع من وزراء ومدراء ورؤساء لجان ونواب وغيرهم ولازم يتحركوا باتجاهه .
وين بدنا انا وغيري وكل الشباب نروح بحالنا ،ما النا غير هالبلد !
حسبنا الله ونعم الوكيل
