دولة الدكتور عبدالله النسور – ابوزهير المحترم
يبدو ان الله ابتلانا بك وان بلاءه سيطول ..
المستشارون الذين تدفع لهم رواتب بالألوف والذين تفتق ذهنهم الشيطاني عن استشارات نجم عنها رفع .. المحروقات .. الغاز .. الماء .. الكهرباء .. رسوم الترخيص .. رسوم المحاكم الشرعية ..
بحب احكيلكانهم ضحكوا عليك .. آه والله ضحكو عليك .. وفي شغلات ما حكولك عنها علشان ترفعها كمان .. لا تبتسم .. أنا بدي ادلك على الاشياء اللي ما حكولك عنها .. خذ عندك .. شهادات الميلاد .. شو تكلفة اصدار شهادة الميلاد دينار واحد .. يعني انت بدك سنوي أقل شي 6 مليون مواطن جديد لحتى تجيب 6 مليون بالسنة .. صح ؟؟ .. وهذا الاشي ولا حتى بمنامك ممكن يصير .. فشو رايك لو تعمل شهادة الميلاد ب10 دنانير هيك بتلم غلة صح .. وبعدين عندك في اليوم الواحد 5صلوت شو رايك لو تفرض ديناربدل دخول المسجد لغايات صلاة الفرض فقط .. وربع دينار عن كل صلاة سنة .. والله لتكيف .. واذا حدا بدو يحضر درس ديني بدفع خمسة دنانير .. وهيك ما بتلحقوا لم مصاري .. شغلة ثالثة .. الحمامات العمومية .. من كل عقلك بتقبل ب100 فلس بدل دخول الحمام .. واحنا بصراحة صرنا شعب مليان مصابين بالسكري والضغط والقلب وبنوخذ مدر بول اكثر من أي شي ثاني .. يعنيبصراحة لو رفعت الدخولية برضو بتستفيد .. يعني يا كبير لازم تستفيد من اكلنا ومن مخرجاتنا كمان .. مش لازم اشي يفلت من بين اديك .. ضل شغلة .. طبعا من كثر قراراتك اللي جابتلنا الضغط والسكري والقلب وكل الامراض القاتلة نسبة الوفيات رايحة ترتفع وطبعا هذا الموضوع في من وراه غلة .. شو يعني دينار رسم شهادة الوفاة .. يا رجل والله موزمبيق بوخذو اكثر من هيك .. مش عيب انك تقبل ان يظل الرسم دينار .. والله عيب انا ما برضالك اياها ..
دولتك شفت كيف احنا بنحبلك الخير وبندلك من وين تجيب مصاري .. مش زي مستشارينك اللي بلمو مصاري ومش عارفين من وين يزيدوها ..
طبعا دولتك بتحكي شو هالمواطن اللي بدور كيف نزيد الرسوم عليه .. لو كل المواطنين زيو …
لا تستعجل دولتك … انا ما بعمل معك هيك لله .. بس انا بحكيلك شو السر …
لحتى لما أرفع ايدي وادعي لرب السما ان يشيلك عن ظهورنا ما احس بأي ذنب تجاهك .. .. وزمان قالو اشتدي يا ازمة تنفرجي ..
