خطط مش على مقاسنا

خطط مش على مقاسنا
يا أخي وإنت ماشي بالسوق بتشوف الأواعي ع المانيكان جايات صب ومدوزنات وجسم مثالي.. وتبلش تتخيلهم عليك بتطلع خيلة.. زي الممثلين الاجانب

المهم في حالة إنك اشتريت لا سمح الله. وتبلش تقصير وتضييق..وتزبيط.. تروح تشمطلك صورة.. ألا إنت طالع شبه زكية زكريا مش مبينلك تضاريس..
.
طيب ما هي اللبسة كانت تجنن عالمانيكان.. ليش طالع فيها شكلي زي الصومعة..؟ ؟
مهو المانيكان جسمه مثالي عشان هيك لابقة عليه اللبسة.. ولما إنت تشوفوا بالبترينة بتنسى حقيقة جمال تضاريس و تحويلات ومطبات جسمك.. و تتخيل حالك مثل المانيكان.. وهذا أسلوب جذب ودعاية..
تبلش تصحى للحقيقة بعد ما تقيس.. وتبين معالمك الحقيقية على المراية.. بس بتكابر وبتقول مع التقصير و التزبيط بصير تمام.. ويقنعك #البياع إنه بتجنن بس بدها تزبيطات..و #اصلاحات

ولما تروح ع الخياط يحتار من وين يبلش يدوزن وإذا اخترت للإصلاح خياط تيس بيعملك البنطلون زي المحقان بس بيقنعك إنه هيك أحلى.. وإنه زابط عليك..

بالأخير تضطر تجامل حالك وتصرح إنه اللبسة جديدة.. وأكيد بعد الإصلاحات صارت أجمل.. وترى مع أول غسلة أكيد رح تزبط أكثر..

مشكلتنا بنستورد خطط مش على مقاسنا أو هي تجينا جاهزة بس مش على قياسنا لأنها مش إلنا.. وبنتناسى إنه عندنا ترهل سياسي وإداري… و #كروشنا مش متناسقة مع #خلفياتنا السياسية.. والخصر مش اقتصادي.. و الكتاف #هابطة.
.
بس البياع ممتاز رح أظل اشتري من عنده.. لأنه هو الوحيد إللي شايفني حلو باللبسة
.
.
#معاناة_كرش

#وليد_عليمات