خطة امنية
نور الجابري
الشوارع و الملاهي
و المناهج و المنافذ
سلموها الحرامية
للسفارة الأمريكية
و الليالي و الأيام
و الحلال و الحرام
اصلا شو هو النظام ؟
هو خطة امريكية
اهدم فكرة
امنع قداس الكنيسة
سكّر جامع
اهدم لا تخلي صوامع
و ازرع كاميرا بكل شارع
بحجة الوضع الوبائي
تممّ الخطة الامنية
اكتم صوت الشعب الحاير
و احذف من منهاج العربي
آيات التاريخ الغابر
و ركزّ ع الفكرة السلمية
لا تتردد
انا بتذكر قبل سنين
منهاج التوجيهي اتغير
كنّا بندرس في المنهاج
قضية فلسطينية
و لا تحسب للشعب حساب
ع الستة سكر البواب
و عين مجلس الاعيان
و ارسم مجلس النواب
كلو موافق كلو مطاطي
الثقة مية بالمية
حيف ع كل الملايين
صار الصاحي منهم ضايع
شباب و همه يكون فايع
حتى التك توك و الفيس بوك
اصلا خطة تكتيكية
و خفف من حراس الأقصى
خفف حتى الحد الأدنى
و اذا الشعب بيوم اتململ
خفف ضخ الاوكسجين
مصيره هالشعب يلين
ينسى المهد و ينسى الصخرة
و ينسى مكة و فلسطين
و ينسى شو معنى الحرية
اصلا شو معنى الحرية
بكل الدول العربية
الحرية انك تختار
بين الاحمر و بين الحمار
بين جهنم و بين النار
بكل الدول العربية…. الحرية كلمة ملغية
معناها بكل اختصار
بين اثنين لازم تختار
و الاثنين حرامية
هيّه هيَّه و نفس المعنى
سميها ديموقراطية
اصلا كل الشرق الأوسط
و زيد عليه من الغرب شوية
محكوم و الحاكم واحد
السفارة الامريكية
و امريكا هي اسرائيل
من الفرات الى النيل
و من طهران لتطوان
و من يثرب للجولان
مهما اختلفت القومية
و مهما اختلفت الهوية
ما فينا حر و احرار
حبينا عيش العبودية
و ممكن حتى تصير القِبلة
للمسلم و للمسيحي
للدرزي و للكردي
للأمازيغ و العلوية
السفارة الامريكية .
