خبز شراك وافل
د. حسام العودات
كان فيه نوع @شوكلاته اسمها تيلا ، وكان فيه بنت انجليزية بتحب هاي الشوكلاته كثير
البنت زاد وزنها كثير كثير ، وصار أبوها يمنعها توكل هاي الشوكلاته ، ولما يشوفها بتوكل من وراه ، يصيّح عليها ويقول : نوووو تيلا ، نووو تيلا
No tella , no. tella
ومن هون أجت تسمية #النوتيلا
ورد ابني بعيد ميلاده طلب نروح على مكانه المفضل الكريبلو ، اللي صار لازم يفتحوا بجانبه غرفة عمليات لقص وتكميم المعدة ، على قد ما فيه سعرات حرارية بالحلويات اللي بقدموها .
حكيتله هاي القصة اللي من تأليفي طبعا ، وخبرته يخفف #حلويات ، لإنه جدّي كان متولع بالنوتيلا والوافل بعد وجبات اللزانيا اللي كانت جدتي تحبها كثير مع الباستا بالبشاميل ، واستغرب من كثرة الأمراض اللي صابت جدّي ، حتى إنه بمستشفى ميو كلينيك ما قدروا يعالجوه .
طبعا ورد مثل شعبنا ، بعرف إنه اللي بسمعه كله خرط ، بس لما يتغطى #الكذب بنوتيلا ، بتتحول خبزة ( #الشراك ) من طحين مش مدعوم لعجينة #وافل ، واتحلى يا مواطن بدل ما تموت قهر ودمك مسموم .
