حكي للبيع..
خاص #سواليف
مقال الإثنين 9-5-2022
تماماً تماماً خالية الرفوف، لا شيء فيها سوى كناسة المحل في الزاوية ، غبار الوقت فوق #الطاولة ، وبياض على الحائط على شكل #قطرميز صنعه السناج الذي غطّى الجدران عندما كان هناك “قطرميز”أيام العزّ..بُقع زيت على خشب #الرفوف ، ربما هذا كل ما بقي من ذكريات بضاعة الطحينية أو علب الحلاوة ،#زجاجات الكولا الفارغة في الصناديق بعد أن نسيهن أو أهملهن موزع الشركة منذ سنوات فأصبحن جبالا شاهقة للعناكب والذباب الذي قتله سكرته ، الريح تلعب بكفّتي الميزان صعوداً ونزولاً ..وأبو يحيى يتكلم للرفاق فالح الاطرم ، عودة الأمزط، فؤاد اللهس، صالح الأخرس، أبو طايل عن فائدة التجارة وفرصة توسّع الدكّان..
أبو يحيى: الرزّ يا أخوان فيهوش فايدة كثير ، بس عالبيع بيجمع ، يعني لو تبيع لك 400 كيلو باليوم نعمة كريم..ان شاء الله بقول غير تشدّ الحركة هاليومين وألحق ال400 كيلو..كنت هون مشّ ملحّق…خزّ..أكحش الزباين كحش من الدكّانة..بدي أرتاح يا عمي..
“ينظر الجميع للدكان الفارغة ويصمتوا”..
فالح الاطرم للجموع : شو بيقول؟.
المجموعة: بيقولوا مش ملّحق ..ورح تشدّ الحركة هاليومين..
فالح الأطرم: آه شو عليه..
ثم يعود أبو يحيى للحديث وهو ينكش أسنانه بقصلة قشّ: ترى بسوق الجملة كلمتي ما بتصير ثنتين، اللي بدّي اياه بوخذه وبالسعر اللي بحطّه ..ثم يضحك ويقول هناك “مسمييني”الذيب..لأنه صيدي حار،وشو ما بدي بجيب ،سُكّر على زيت على معلبات على طحينة..والله مش ملّحق كنت…بقول غير تشدّ الحركة ..
فالح الأطرم : شو ماله ؟
المجموعة: بيقول مش ملحّق ..ورايحة تشدّ الحركة هاليومين.
فالح الأطرم يجول بنظره أرجاء الدكان الفارغة ويقول: آه شو عليه..
أبو يحيى: بفكّر أروح ع البرازيل ،أجيب لي باخرة باخرتين سكّر..على ناقلة “زيت قلي” بعد ما نبخّر ناقلة النفط من الخليج أجرها وراي بالكم ، وننظفها هناك “نطرمها” زيت قلي وآجي مروّح ، خلّي الشعب يتبحبح..ساعتها قعدة باب الدكّانه ما فيه..بكون مش ملّحق.
فالح الأطرم: ماله؟..
المجموعة : بده يجيب بواخر سكر وزيت قلي من البرازيل..
فال الاطرم: منهو الرزيل؟؟
المجموعة: من البراااااازيل..من البراااازيل..حجي
فالح الأطرم: ولك أبو يحيى…ولك انت شو بتبيع بدكّانتك من عشرين سنة وجاي مهي فاااضية؟
أبو يحيى: بدّك الصحيح يا حجي..ببيع حكي…..هي الشغلة الوحيدة الموفّية معي، البضاعة هوا ببلاش…والحكي لا عليه جمارك ولا عليه ضريبة..انتو عارفين اني كذاب وساكتين بتسمعولي وأني عارف انكو عارفين ومع هيك مش مستحي وبعدني بحكي..
ونحن كذلك..دكّانتنا فاضية وبس بنبيع حكي..
#احمد_حسن_الزعبي
ahmedalzoubi@hotmail.com
