#المحلل_والباحث_السياسي_ابوسروال_اصفر
محمد عياش القرعان
الأخ اللي طول نهاره قاعد بالبيت ومتمدد على فرشة اسفنج ونص اجريه طالعات منها لبرّا، ومرتكي على المخدة ام الشرايط ولابس شبّاح مبقْط وسروال اصفر كان بالزمانات لونه أبيض، بس لونه حوّر من كثر الاستعمال، وحاط قدامه ابريق شاي من الحجم العائلي، وبمضيها طول اليوم يقلّب بالريموت من محطة لمحطة وعمره ما فتح كتاب او جريدة….وبس يشوف منشور طويل بفشّق عنه، وبقول راسي بصير يوجعني اذا بقرا جريدة او كتاب او مقال طويل، واذا غمّيت عيونه وطلعته من منطقته الي ساكن فيها وحطيته بمكان ثاني بجوز يضيع وما يعرف يروح على بيته،
بس لما بتقعد معه بتحس حالك قاعد مع ضابط من مخابرات الغستابو او الكي جي بي او ال سي آي إيه،
وبشعرك انه بتفوق على مخابرات دول كبرى من كثرة المعلومات والاسرار الخطيرة التي يمتلكها!!
خاصة لما يصير يحكيلك عن المؤامرات والدسائس والسياسات الدولية، بتحس حالك قاعد مع هنري كيسنجر او توماس فريدمان….. او الدكتور بهاء الأمير او الدكتور اكرم حجازي….!!
من آخر تحليلات ابو سروال اصفر….
بقولك انه أمريكا هي اللي صنعت الفايروس وارسلته للصين عشان تقضى على الصين، بس الفايروس رجع عليها، ابصر كيف!!
ومرة بقول انه هاي مؤامرة دولية عشان شركات الأدوية تربح من وراء اللقاحات والادوية….!!
ومرة بقول هاي مؤامرة من الصين عشان تضرب امريكا…بس الفايروس فل من المختبر.. بس هو كيف عرف هاي المعلومات الخطيرة اللي امريكا ما عرفتها ما بعرف؟؟!
ومرة بقول انه هاي مؤامرة على الاسلام والمسلمين؟!!.
ومرة بقول انه هاي مؤامرة عشان يتخلصوا من كبار السن في العالم؟!!
ومرة بقول انه هاظ غاز السارين ونشروه بالجو…!!
ولك مهو يا ابو شباح مبقط امريكا وإسرائيل واوروبا وكل دول العالم بتعاني من نفس الوباء.. وصاروا خسرانين الآف الترليونات بسبب تعطل كامل للحياة وتوقف الاقتصاد في معظم أنحاء العالم…!!
يعني انت يا ابو سروال اصفر عرفت انه هاي مؤامرة ومخطط سري،، والدول هاي كلها مش قادرة تعرف انها مؤامرة عليها؟!!
ترى هو نفسه ابو سروال هاظ، من جماعة نظرية انه صدام كان عنده مفاعل نووي تحت الارض، وعنده غرفة تحت الارض فيها شاشات بقدر يشوف فيها كل دول العالم وهو قاعد بالغرفة.. وما قبل يورجيها لحسني مبارك لأنه عارفه خاين…. وهو نفسه صاحب نظرية انه صدام لم يُعدم واللي اعدموه واحد شبيهه…. وقدر يضحك على امريكا وما قدرت تميز بينه وبين شبيهه، بس ابو سروال قدر يميز بين صدام وشبيهه، وهو نفسه الي شاف صدام على القمر؟!!!
اما أنا العبد الفقير.. فإن رأيي الشخصي حول كورونا،
والله انا محتار وما بعرف اشي وعلمي علمك خيوه …. لا أنفي ولا اثبت اي شيء…
لعله خير لهذه الأمة… والله أعلم
