اللي عنده دبابات ، مدرعات خربانه للبيع
د. حسام عودات
#سيارات شراء #الخردة تنتشر بكثره ، والشارع الذي أسكنه في اربد تمر به هذه السيارات صباحا ومساء بلا كلل ولا ملل
ثم يسألني إبني قبل سنوات : بابا ليش ببيعوا شغلات خربانه ، ومين بده يشتري أشياء خربانه للدار ؟
حكيتله إنهم بشتروا شغلات خربانه .
حكالي : بس تاع السيارة بقول : اللي عنده غسالات وثلاجات خربانه للبيع .
لازم يقول للشراء مش للبيع .
المهم إحنا هيك بالأردن ، بنقول إشي وقصدنا إشي ثاني
والشغلات اللي بقولوا عنها خط أحمر ، هي اللي بتفتح إشارة القرارات الخضراء عليها .
أنا اسمعت بالطب عن عمى الألوان ، بس ما اسمعت عن عمى المفردات .
والشعب اللي حياته كلها خردة ، مش فارقة معه قواعد اللغة العربية ، وتاعين الخردة لازم يعرفوا إنه إذا ما صار نص ماتور الغسالة والثلاجة سيليغون وتيب ولحام ما برموهن . بلكي بعد الحرب الأوكرانية يتحسن السوق .
وغطوا سيبويه والفراهيدي بلحاف خربان للبيع
