“الفرشاية” والكركش”

مقال الاثنين 15-6-2020
“الفرشاية” والكركش”

وقت الفراغ الطويل و”قلة الشغل” والطفر تجعل ربّ الأسرة أحياناً “يتفشش” بأي شيء ليشعر أنه منتج ، صيانة من هنا، حرق أعشاب حول الدار من هناك، دهان غرفة في يوم ثالث، نفخ أواستبدال عجل “عرباية الدز”..الخ من المهمّات التي اذا لم تنجز لن تؤثر شيئاً على سوية الحياة اليومية..
قبل يومين قرّر أبو يحيى أن ينبش مخزن البيت ليعرف الصالح من الطالح ، والغرض الذي يمكن الاستفادة منه أو أو إعادة تدويره أو بيعه لأول بكم عتق أو رمية في حاوية القمامة ، لفّ ثوبه الرمادي على خصره ، وزرع طرفي الشماغ في العقال وشمّر عن ساعديه وبدأ يقتحم الكوم الكبير من “الكركش” ؛ أجهزة كهربائية أدوات مختلفة ، طبليات خشب ،بطاريات قديمة، كراسي مكسّرة ، إطارات قديمة.. يقابله بالطرف الآخر في البحث والتقييم ابنه شلاش..
شلاش: يابا هاي الصوبة شو ؟
أبو يحيى: خليها ع جنب يمكن نوخذ التنك تبعها ، كمان شبكها بعده جديد حوينة عليه..
شلاش: المكوى هاظ؟
أبو يحيى: خليه بجنب الصوبة ، يمكن نعتاز السلك والفيش!
شلاش: هاي الغسالة مش مصفي منها غير البرميل يابا..نكبّها ولا نبيعها لتبع العتق؟
أبو يحيى: لا شو نكبّها..خليها بجنب المكوى والصوبة..بنحط فيها تراب وبسويها حوض زريعة..
شلاش: هاظ التلفزيون “أبو فقار”؟؟ بقت “صورته امّطمطة” وبينمّش وبيقرف…نبيعه؟
أبو يحيى: استغفر الله العظيم..انت بس بدّك تبيع !..بكرة بتيجي موجة حم..بنصير نتعلل ع ظهر الحيط..بنديره هناك..منين أجيبلكو تلفزيون جديد..خليه خليه بجنب الصوبة والمكوى والغسّالة..
شلاش: طيب يابا..يابا هاي الكنباية كافتة ومالهاش ظهر…نكبّها؟
أبو يحيى: ول عليك يابا..خليها الها عازة.. بوخذها عند الزيتونات القبليات وبصير أريح عليها يوم أنكّش عليهن هناك..حطها عالكوم..
شلاش: القلن هاظ ؟..خابره مخزوق..
أبو يحيى: أشوف..لا بنحطّ له علك يا نتفة زفتة ..وينصير نعبي فيه مي للغسول للطشات..حطه ع الكوم الجديد..
فعليا كل ما قام به أبو يحيى وابنه أنهم نقلوا كوم الكركش من مكان الى مكان قريب آخر..دون تجديد او استصلاح او بيع أو عزل أو كب..
غاص شلاش..بين ما تبقى من كسر الخشب وقطع الحديد ورفع ” فرشاة كنادر” قديمه مهترئة من كثرة الاستخدام..ثم قال لأبيه : يابا هاي أحطها كمان ع الكوم الجديد؟
أبو يحيى : لا يابا هاي كبّها ولا تأسف عليها..
شلاش: اشمعنا هاي لحالها أكبّها يابا؟ …
أبو يحيى: لأنه “فرشاية الكنادر” الغرض الوحيد اللي ما بحترمه يابا ..
شلاش: ليش؟ ..
أبو يحيى: “لأنه بيسوّد وجه عشان يلمّع كندرة غيره”..

أحمد حسن الزعبي
ahmedalzoubi@hotmail.com

مقالات ذات صلة
اظهر المزيد

مقالات ذات صلة

‫2 تعليقات

  1. لماذا عندما اضغط على اظهار المزيد لا يفتح المقال لو تكرمتم …

    رد المحرر

    سيتم ايصال الملاحظة للقسم الفني

  2. اشتقنا لقلمك أستاذ أحمد ،
    عم تقل كتاباتك عن زمان عسى المانع خير
    ولا مخلي الافكار للبرنامج تبعك، 😅

اترك رداً

زر الذهاب إلى الأعلى