التهديد باستخراج النفط
د.نبيل العتوم
#استراتيجية #فاشلة ؛لما #الحكومة تطفر وبدها تتسلبط وتحصل على معونات خارجية من الاشقاء بتطلع بموال: وجود #النفط و #الغاز في الاردن واستخراجه . تصريح شركة البترول بهذا الخصوص سبقه شعار الايام الجميلة لم تأت بعد..خلينا نربطها بابتزاز الخارج ….، بانتظار تزريق #معونات ومنح ، اذا ما تم ايش رح يصير ، رح يتبعه تصريح عن غاز الريشه الواعد وضوء اخضر بسجال اعلامي ،مع الحرص على تأجيجه من خلال استضافة مسؤلين سابقين “ملصمين بالشماغ الاحمر المهدب ” عيونهم بتتلاقط ،وبفاغروا مفاغره بالسواليف ،حتى يرصد الخارح ان #الشعب_الاردني قول وفعل وفيه ضغط شعبي جارف ،بعده اذا ما زبططت تزريق تقرير عن نحاس ضانا ، بعده عن اليورانيوم، بعده عن السليكا، بعده عن التهديد بالسياحة الدينية والعلاقة مع ايران ، مشفوعا ربما بفتوى ، بعده ربما التلويح باقامة علاقات مع كوريا الشمالية وفنزويلا …بعده استحضار التحديات والاستهداف والمؤامرات الخارجية ودورنا في منع اغراق الجوار بالمخدرات والسلاح ، بعده الكشف عن عملية ارهابية تم اكتشافها سابقا ويتم توظيفها لاثراء الحدث ، ثم تعديل وزاري بسيط او موسع او حتى تغيير وزاري والمجيء بنخب محسوبة على الدولة سين وصاد… نكاية ، اذا ما زبطتت تحريك مظاهرات واحتجاجات ضمن سقف ومسار محدد ، اذا ما زبطتت التلويح باستحضار جماعة الاخوان المسلمين فرع الدراويش مع تطعيم اثنين من الصقور الي اصواتهم مش بحاجة الى السكر الفضي للخطابة من على منبر مجلس النواب …طيب وبعدين…. مع هل الموال والطابق الفاضي ….اعقلوا ياجماعة وفكروا بمشاريع استراتيجية تنهض بالاردن وشعبه ، وفكونا من هل الفيلم الهندي ، … احنا وين والعالم وين … ،والكل بقول لوين رح نوصل … احنا وصلنا ياجماعة… وكشنتنا …
