أَردني و نص! / رامي علاونة

أَردني و نص!
فى إحدى مناطق عمَّان الراقية وقف مندوب الإحصاءات أمام بوابة الڤيلا. حَدَّثَ نفسه: ما شاءاللة ياهالڤيلا! أكيد هاي لواحد من الهَبِيْشِة تبعين الحكومة، أو لواحد من تبعين البِزنِسْ. ما علينا! الله يرزقنا!
قَرَعِ الجرس، و بعد دقيقة فَتَح الحارس الباب.
المندوب: مرحبا، أنا مندوب الإحصاءات ممكن أحكي مع صاحب البيت؟
الحارس: تْفَضَل. ثم أدخله الى قاعة كبيرة لاستقبال الضيوف. سَواني و يكون الباشا عَندك.
أثناء الانتظار أخذت عَيْنا المندوب تجوب أرجاء المكان. تَنِهّدَ ثم حَدَّث نفسه: معقول هذا الزلمة بَدا حياتة مْعَلمْ مَدرسة مثلي! و الله كلشي بصير، الله يعطينا! في هذة الأثناء دخل صاحب البيت.
صاحب البيت: أهلا وسهلا!
المندوب: هلا بيك، أنا فلان الفلاني، مندوب الإحصاءات. بدي آخذ من وقتك كم دقيقة إذا سمحت.
صاحب البيت: إيْه تفضل عيني، إسأل شو ما تريد.
المندوب: يفتح الاستبيان و يبدأ بطرح الأسئله. الإسم الأول؟
صاحب البيت: عبد الرسول
المندوب: إسم الأب؟
صاحب البيت: عبد الحسين
المندوب: إسم الجد؟
صاحب البيت: عبد الكاظم
المندوب: إسم العائلة؟
صاحب البيت: ماكو إسم عائلة
المندوب: كيف يعني؟
صاحب البيت: عيني أنا من قبيلة العْبادي (بتسكين العين) لكن الإسم مو مكتوب بالوثائق الرسمية.
المندوب: يعني شو اكتب بخانة إسم العائلة؟
صاحب البيت: عيني ما تكتب شي.
المندوب: طيِّب ماشي. الجنسية؟
صاحب البيت: أَردني
المندوب: أي لا!!! كثير هيك! كيف هاي؟
صاحب البيت: أَقولْ لك أَردني. تْحَّسِبْني أتْقَشمَر وياك؟
المندوب: لا الإسم أُردني و لا اللهجة أُردنية! شو اللي أَرْدَنك؟
صاحب البيت (بدت علية علامات الانزعاج): لَكْ شِنو تريد إنتة؟ أقول لك أَردني.
المندوب: ورجيني هويتك أو جواز سفرك إذا سمحت!
على مضض، يعطيه صاحب البيت هويته
(يقرأ) المندوب: الإسم عبد الرسول عبد الحسين عبد الكاظم، الجنسية أردني. لاااااااا، أكيد هاي الهوية مْزَوَّرَة!
صاحب البيت: فِعلاً إنك ما تِفْتِهِم! أنا الحين أورجيك. يُمسك بهاتفه النقال، و يتَّصِل بأَحد الأصدقاء. يشرح له الموقف.
صاحب البيت (يعطي الهاتف للمندوب): خُذْ كَلِّمْ.
المندوب: ألو… (هنا يقف المندوب على قدميه، تتلخبط معالم وجهة و يبدا جبينة بالتَعَّرُق) نعم يا باشا… حاضر سيدي، أمرك معاليك، زي ما بدك دولتك، حاضر، إحنا تحت أمر سعادتك. أهلين، مع السلامة عطوفتك.
صاحب البيت (بنبرة غرور): شِنو عيني؟ أَردني لْو مو أَردني؟
المندوب: أَردني و نص!
و على رأس الصفحة يكتب بالخط الأحمر:
ملاحظة: المواطن عبد الرسول عبد الحسين عبد الكاظم ينتمي الى قبيلة “العْبادي” (كَتَبَها دون تسكين العين) و والده شهيد من شهداء الكرامة!