“مَالك ع الولد”

من قام "بتزييت"العجلة في لحظة الانزلاق؟

مقال الثلاثاء 20-8-2019
“مَالك ع الولد”
البعض ممن يطربون لرنين رسالة البنك أنه تم إيداع “مكافأة” كذا في حسابك ..ما زال يحاول تصوير ما يجري أنه شيء عادي ،فالوضع تمام،والأخلاق مثالية ،والأمن مستتب ،والاقتصاد في انتعاش مبهر،والقيم بخير، والمجتمع وديع كعين العصفور ، بعض “المدفوعين مقدّماً” حاول أن يقول أن عمّان ليست الوحيدة ، فما يحدث بها يحدث بباقي العواصم ، وأن الانحدار الأخلاقي شيء عادي والتآكل المجتمعي مجرّد تطور، وأنا لا ألوم هؤلاء البتّة ..لأنهم هم أنفسهم جزء من هذا الانحدار الأخلاقي وهم من قاموا “بتزييت”العجلة في لحظة الانزلاق..على أيه حال يذكّرني هؤلاء بدفاع الأم المستميت عن انحراف ابنها “الهامل” أمام الأب الغاضب محاولة تهوين ما يقوم به، وبأنه ليس الوحيد الذي يقوم بهذا الفعل المشين وكأن ما يقوم به الآخرون يبرر شذوذ المحروس..
الأب : طاخ طيخ طوخ يا ملعون #$%@#$ !
الأم: مالك ع الولد؟
الأب: لقيت ابنك بيدخّن يا مرة !!
الأم: وما يدخّن..مهي كلها بتدّخن..هي وقفت عليه…لا هو عيب ولا حرام..

بعد شهرين
الأب: طاخ طيخ طوخ يا ملعون #$%@#$ !
الأم: مالك ع الولد؟
الأب: لقيت ابنك بيسكر يا مرة!
الأم: هوه ..هوه..انا فكرّته عامل عمله..مهي كلها بتسكر! المسؤولين بسكروا..بالمسلسسلات بيسكروا..أصلاً الكاس لايق بين أديه.

بعد شهرين
الأب: طاخ طيخ طوخ يا ملعون #$%@#$ !
الأم: مالك ع الولد؟
لأب: لقيت ابنك بحشش يا مرة!
الأم: أيوووه..أنا فكّرته عامل عمله..مهي كلها بتحشش..أصلاً بأميركا وأوروبا مسموحة الحشيشة..بيحشش عشان ينسى اللي هو فيه يا بعد أمه!.

بعد شهرين
الأب: طاخ طيخ طوخ يا ملعون #$%@#$ !
الأم: مالك ع الولد؟
الأب: بقيت أبنك بيوخذ “سكوبي” يا مرة!
أيوووه..أنا فكّرته عامل عمله..مهي كلها “بتسوكب”..أولاد الذوات “بيسوكبوا”..رجال الأعمال بيسوكبوا..الفنانين بيسوكبوا..لو بيضر كان ضر غيره!.
بعد شهرين
الأب: طاخ طيخ طوخ يا ملعون #$%@#$ !
الأم: مالك ع الولد..
الأب: لقيت ابنك “……” يا مرة!
الأم: أيّوووه..أنا فكّرته عامل عمله..مهي كلها “……” هو في ظل حدا بهالبلد.. ما “…..” خلّه يفضّي عن باله!.

بعد شهرين
الأب: ابنك بالسجن يا مرة!.
الأم: أيّوووه..أنا فكّرت صار له اشي… أكيد دبّروا له بلوة أولاد الحرام… السجن للرجال وبكرة بيطلع بيرفع راسي!.

وهيك ضاع الولد..بعبارة مالك ع الولد.

احمد حسن الزعبي
ahmedalzoubi@hotmail.com

الوسوم
اظهر المزيد

اترك رداً

زر الذهاب إلى الأعلى
إغلاق