سواليف
تلقى موقع سواليف الإخباري رسالة كتبها احد الوافدين المصريين في الأردن قاصداً ايصالها لوزير العمل
ويقوم موقع سواليف بنشر الرسالة كما وردته دون زيادة او نقصان
رسالة من وافد مصري إلى وزير العمل الأردني..
بصراحه مش عارف أبدا منين.. عندي كلام كتير وتعليقات كتير على كل إلي بيحصل في مصر وجميع الدول العربية المسلمة.. باختصار أنا مش هدخل بالسياسة ولا هتكلم عن سياسة أي دولة لانو الكلام في المواضيع دي كتير ومش هيقدم ولا هيأخر.. وأصبح يزعج ناس كتير بتحب تعيش دور الضحية.. وخليني ساكت أحسن..
أنا هتكلم في موضوعنا ك #مصريين في #الأردن ومشاكلنا كمصريين في #الأردن.. بما إني عايش بالأردن أنا بعتبرها بلدي الأول مش التاني.. لأني قضيت فيها أكثر من نصف عمري.. كنا بنسمع زمان أهلنا كانوا بيسافروا أي بلد بالبطاقة وبالجواز.. ومع مرور السنين تغيرت النفوس.. وصار فيه طمع وحقد من بعض الناس.. إلى أن وصلنا إلي ما نحن فيه الآن.. كان أي مواطن عربي يسافر أي دولة عربية في أي وقت.. ومن بدون علم حد لأنو باختصار إحنا دم واحد كشعوب.. إحنا روح وحدة وما بنعترف بحدود بينا ولكن تغير النفوس والطمع والحقد عند بعض الناس إلي لها مصالح.. فرقنا وخلتنا نكره بعض ونحقد على بعض.. باختصار يا معالي الوزير.. لازم تشوفولنا حل #كمصريين في #الأردن..، نحنا نشارككم في بلدكم بعرقنا وبمجهودنا لم نأت لنسرق ولا نخرب.. نحن جئنا من بلدنا تاركين أعز ما لدينا.. ونقضي الشهور والسنين لكي نسعدهم ونتعب أنفسنا بالغربة وتعب الشغل وهلاك الأسعار في #الرواتب و#الإقامة و #الكشف_الطبي إلي ملوش أي داعي.. أنا مش حابب أطول عليكم بكتاباتي.. بس راعو #ربنا وراعوا #ضميركم وتعاملو معانا بما يرضي ربنا وضميركم وقدروا ظروفنا والوضع إلي عايشينه عندكم.. وتاركين أولادنا #متغربين وكل إلي مجرب #الغربة منكم هيفهم كلامي كويس..
أنا بطالب #معاليالوزيرالأردني ومش هطالب #سفير_بلدنا هنا لانه طالبناهم كتير.. وعل الفاضي يا معالي الوزير.. مطالبنا صغيرة ومش صعبة حضرتك.. عملتم حملة تفتيش مكثفة عن العمالة المخالفة.. ده من حقك، والله واحنا متفهمين كدا وعايزين كلنا نمشي قانوني ومش مختلفين علي كدا أبداً.. بس يا معالي الوزير الرحمة بالرسوم.. والله العظيم ٩٥٪ من المصريين بيدفعوا ثمن التصريح من جيوبهم.. وما في حدا بيساعدهم.. أنا بدفع ٥٣٠ دينار في مكتب العمل.. وبدفع كشف صحي كل سنة ٣٠ دينار..، ولكن غيري بيدفع ألف دينار وأكثر بسبب الاستغلال من السماسرة ولانه مش لاقي #كفيل وده كلو وراتب المصري هنا من سنه ٢٠٠٧ إلي الآن محصلش زيادة فيه وإلي حصل زيادة فيه بتكون حاجات لا تذكر.. وقليل من حصل على الزيادة.. مطالبنا بسيطة يا معالي الوزير.. وباختصار إحنا عاوزين من حضرتك:
١- تصويب أوضاع فعلية ولمدة جيدة..
٢- تخفيض رسوم التصريح لانه والله بندفعو إحنا مش الكفيل..
٣- عودة رسوم الكشف_الطبي ٢٠ دينار لأن زيادة الكشف الطبي ظلم وحرام لانو لا يكلفكم ٥ دنانير وتحسبه للمصري ٨٥ دينار..
٤- لو حضرتك كارهنا كمصريين صارحنا بطريقة مباشرة واطلع احكيلنا روحو بلدكم والأرزاق بيد الله..
أدام الله بلدنا وبلدكم وآسف على الإطالة..
(أيمن الباشا)
