نحن لا نزرع الإبداع
عمرك سمعت في العالم العربي عن قصة نجاح لشاب تحول فيها من صفرونير إلى مليونير؟ طبعاً كلامي واضح شاب من العدم اصبح ناجح بمشروع أو فكرة، وأكيد راح نستنثني جميع الشباب اللي كافح بجاه ابوه وجده، ياترى كم حالة راح تتبقى إذا تبقى؟ وكم طاقة إبداعية مدفونة او هاربة إلى الخارج؟
بحب اطالع على قصص النجاح في العالم، وبتخيل ابطالها عاشوا في بلادنا، الاحداث فجاءة بتتحول لدراما أو كوميديا سوداء، تخيلوا معي لاري بيج صاحب فكرة موقع غوغل بيأسس مع صديقه سيرجي برن شركة غوغل في كراج سيارة، الامانة وقتها راح تنسى كل حفر وخوازيق الشوارع وتروح عليهم، ها شباب الترخيص بقول كراج سيارة وانتوا عاملينها مقر شركة ؟ ما شاء الله
لاري بيج: بس يا سيدي هذا مشروع ريادي وبساهم في حل مشكلة البطالة.
الامانة: القانون قانون، وانتوا مخالفين للقانون، غرامة وإزالة ومصادرة جميع الاجهزة.
لاري بيج بتفق مع سيرجي بيرن على تعويض الخسارة بفتح صالون حلاقة ويسموه تيمن بمشروعهم الاول غوغل.
تخيلوا معي مارك زوكربيرغ مؤسس موقع فيسبوك في جامعة حكومية بيخترق قاعدة بيانات لموقع الكتروني وبأسس موقع تواصل إجتماعي للطلبة بعبروا فيه عن أرائهم، الجامعة راح تصدر قرار فصله لمخالفته التعليمات والانظمة وإساءته للجامعة رئيساً ومنتسبين، ومش راح يكون هذا القرار اكبر مصائبه، راح يتم محاكمته بتهم إطالة للسان ومخالفة قانون المطبوعات والنشر والمساهمة بنشر الشائعات والاكاذيب والمساس بهيبة الدولة، زعزعة السلم الإجتماعي وتعكير صفو علاقتنا بدولة أجنبية وبعد محاكمات ومراجعات لجهات سيادية وقضاء مدة محكوميته، بخرج من السجن بدون مؤهل جامعي ولا شهادة حسن سير وسلوك، وبنتهي فيه المطاف كنترول على خط رغدان إسكان الامير طلال.
الإبداع في كل الدنيا نبتة بتم إعدادها ورعايتها وتوفير جميع الإمكانيات لنموها، الا عنا الإبداع نبته ضاره لا نرغب بظهورها، وفي حال تحدت جميع الظروف وظهرت، راح نوفر جميع المبيدات للقضاء عليها.
