مرشح عشيرة
لقيته في مناسبة اجتماعية ودار بيني وبينه هذا الحديث ، فشكى لي عدم طاعة اولاده له ….وقال :
يا اخوي والله هالاولاد بنشفّوا ريقي مشان يروحوا يشتروا اغراض للدار، والولد الكبير ترجّيته مشان يقرا هندسة، راح اختار الفن غصبن عني ….اما جيل اخر زمن، ما حدا ماين عليهم الله وكليك ……!!!
بعد عدة اشهر …
حصلت مناسبة اجراء انتخابات داخلية لاختيار مرشح العشيرة الذي يريد خوض انتخابات البرلمان …
نفس الشخص الذي شكى لي سابقا عن اولاده، ينوي الان الترشح للبرلمان ، ويريد ان يخوض الانتخابات الداخلية للعشيرة لاختيار مرشح العشيرة الاوحد …
….حان موعد الانتخابات الداخلية …
…فجاءني صاحبي يطرقُ باب بيتي ، وبالمناسبة هذه اول مرة التي يطرق فيها بيتي ، رغم انه قريبي وزميل دراسة ، وللأمانة انا مثله كذلك !!
قلت تفضل يا ابو فلان ؟
قال ما بدي اتفضل خيوه، مستعجل، هسع تعال معي وجيب معك دفاتر العائلة بسرعة ؟
قلت طيب لويش ؟ شو فيه، خير ان شاء الله ؟؟!
قال يزم انت غايب فيلة ؟
يا رجل مهو اليوم الانتخابات الداخلية للعشيرة ، وانا قرابتك وبدي دعمك وغصبن عنك ؟
قلت انا مقاطع ومش مهتم بالموضوع…
وانت بتمون على راسي ، بس شو دخل دفتر العيلة بالانتخابات، اني بعرف انه على بطاقة الهوية ؟!!
قال مهو التصويت على دفتر العيلة، ورب العيلة ممثل عن عيلته وبصوّت عنهم كلهم ؟!
قلت والله عال العال، يا رجل انت بتحكي من كل عقلك، انتو من وين بتجيبوا هالقوانين مش عارف ؟؟!!
بعدين والله يا رجل انا بعرف انك مثقف وجامعي، وكنت اتوسم فيك خير !!
اولا انا ضد الانتخابات على اساس عشائري ويجب ان يمارس الناخب كامل حريته بدون ضغط او تخجيل او اغراء بمال او تذكيره بمصالح سابقة عملها له احدهم …
ثانيا كيف بدك مني اصوت عن اولادي ومرتي واحرمهم حقهم بالتصويت ؟ وانت عارف انه الصوت حق لكل شخص فقط، وما بصير واحد يصوت عن الثاني …انتو وين عايشين ؟ يا رجل احنا بالقرن الواحد والعشرين وبعدكوا بتفكروا بهاي العقلية وممثل العشيرة وقرابتي ولازم تصوتلي وبعدكو دايرين على مراقع فقّس، تمثيل العشيرة وما بدري شو ، متى بدكوا تصحوا ؟!!
بعدين انت شكيتلي من اولادك قبل فترة انك مش ماين عليهم يشترولك خبز واغراض للدار ، طيب كيف بدك تمون عليهم وتصوّت عنهم،وهاي شغلة اخطر واهم من مشترى اغراضك،
يا رجل انت بدك تمثل وطن مش عشيرة واولادك ومرتك احرار باصواتهم، انت كيف بتفكر بهاي الطريقة مش عارف،
وعلى حساب انك مثقف ومعك شهادة جامعية، لعاد شو اقول انا ابو التوجيهي الادبي الراسب ؟؟
قال يا زلمه فكّك من التنظير والمثالية الزايدة، بدك لعاد نتركها للعشيرة الثانية توخذها منا ؟! يا رجل بالله عليك تيجي معي ولا تغلبني ؟!!
قلت اسمع خيوه …هذا قرار نهائي وانا مقاطع اي انتخابات على هاي الشاكلة، لو ابوي نازل ما راح اصوتله، خلص قرار نهائي، لاني مش مقتنع فيها من الاساس ..لانه الاساس غلط وانا مستحيل اتراجع عن قراري وهاي قضية مبدأ ….
وانت على راسي وانا مش ضدك ولا ضد غيرك بس الاساس غلط … ولازم نغير هالعقلية العشائرية ونفكر شوي لقدام، خلص بكفي تخلّف، وبكفي انقرصنا من الجحر الف مرة، اصحو شوي وشوفوا كيف افرزت الانتخابات العشائرية، نواب ضعاف، وبصّيمة ولا بهشّوا ولا بنشّوا !!
قال بعرفك، راسك يابس من يوم يومك …..انداري والله خذلتني وما توقعت انك تفشلني هيك ،،
قلت معلش بكره رايح تعرف الصحيح وانا بعتذر منك ما راح اصوت ….
فخرج غاضبا وهو يتمتم ببعض الكلمات التي لم افهمها، ولم يسلّم !!!!
“للعلم القصة افتراضية من خيالي”
