( انا مسؤول عن كلامي .. ساخر)

يا اخي الكريم .. اي والله العظيم اشي بحط العقل بالكف .. وقعنا بحيرة من امرنا .. لما احضر لقاء او حوار او ندوه تلفزيونيه على مختلف المحطات والفضائيات بتلاحظ الاشخاص الحاضرين جايب معاه كل واحد ( كومة ) ورق وما ان يشتد النقاش اشوي ويريد احد المحاوريين ان يثبت وجهه نظره او يفند وجه نظر الاخر بقوم على السريع بسحب صوره او ورقه من الدوسيه اللي قداموا واللي جايبها معاه وبعرضها على مقدم البرنامج ومن ثم على المحاور الاخر ومن ثم على الشاشه ليراها المشاهد .. وبصرخ وبقولك وهي ورقه تثبت صحه كلامي ومختومه كمان … او قبل ما تتوقع الورقه استطعت بطرقي الخاصه ان احصل على نسخه منها .. يا اخي انا كمشاهد بقتنع بوجه نظر هذا المحاور وبقول والله الزلمه جايب دليل معاه باين عليه زلمه يعني قوي الحجه والبرهان .. واخبط .. فجأه بقوم الطرف الاخر او المحاور الاخر بسحب صوره او ورقه كمان من هالدوسيه اللي جايبها معاه وعارضها على الناس وعلى المحاور وعلى مقدم البرنامج يظهر فيها صدق كلامه وكذب المحاور وافتراءه .. والادهى والامر انو الاثنيين يتحدثون عن نفس الموضوع ونفس الحدث .. مثلا واحد منهم بظهر ورقه انو فلان اسمو ( ابو محمد ) وفجأه هذاك الزلمه الطرف الاخر يظهر ورقه او صوره انو الشخص المعني والمقصود ( مسموش ) ( ابو محمد ) اسمو ( ابو عطيه ) .. يا اخي .. يا اخي .. اتقوا الله فينا اشوي احنا المشاهدين .. انو الصادق فيكم .. الادهى والامر انو الورق ( المبروز ) موقع ومختوم ورسمي هكذا يوحى اليك على الاقل.. يعني فش مجال للشك …. طيب انا شو اسوي .. انو اصدق ؟ … شو استفدنا من هذا اللقاء .. شو النتيجه اللي انا كمشاهد اطلعت فيها … كيف بدي اقتنع بفكره معينه او موضوع معين اذا الاثنين ( المحاوريين ) جايبين بيانات متناقضه كل واحد فيهم داعم حالو بصور او ورق او شهود على صدق كلامه …. لذلك الاحظ بكثير من الاوقات انو مقدم البرامج يتدخل ويقول هاي الشغله بدها ( لجنة تحقيق ) وقيس … ما بنتهي اللقاء الا ومقدم البرامج صار محول وموعز لاكثر من سؤال واستفسار وتعليق على الموضوع الى تشكيل لجنة تحقيق لتوضيح الحقيقه …. لا والله استفدنا …
وبعدين يا اخي .. بلاحظ كمان ظاهره غريبه عجيبه .. كل محاور او طرف بالحوار او الندوه بكرروا عباره ( هذا الكلام انا مسؤول عنو ) … ابدا .. بقوم المحاور بطلع وبنزل وبشرق وبغرب وبدخل وبطلع بايديه ورجليه وراسه بالموضوع وبعيد وبزيد وبقدم وبأخر وبفصل وبقيس على كيفو .. وبطحن الرايح والجاي بكلامو .. وبالاخر بقولك ( انا مسؤول عن كلامي هذا ) .. ايوه … حتى مقدم البرامج انساق ورا السواليف هاي وصار زيهم .. ما بشوف الا وبنط مقدم البرنامج الا وبدخل بالموضوع وبحكي رأيو مع ان المفروض انو يكون محايد بس بنفعل وبصير يشارك بالنقاش متبني فكره معينه وبدو يثبتها ويفرضها على المحاوريين والمشاهدين وبالاخر صار يقول زيهم ( وانا مسؤول عن كلامي هذا ) .. هو حدا سألك ولا جاب سيرتك .. ولا حدا راح يراجعك يا شيخ ..
انا كمشاهد مليون الف مره بطلع بعد حضور مثل هذه اللقاءات او الندوات صفر اليدين .. بطلع فاهم شغلتين بس الا وهما عبارة ( انا مسؤول عن كلامي هاذ ) والشغله الثانيه ( انو كل الاطراف المحاوره على حق ) لان كلهم جايبين ادله معهم من مستندات وصور وورق وشهود تدل على صدق اقوالهم …
مثلا .. فلان مات مقتول وقتله فلان … ببرز احد المحاوريين اوراق وادله تثبت ان المقتول قتله فلان عن سبق اصرار وترصد وهذه اعترافات القاتل .. المحاور الاخر ببرز وثائق واوراق وشهود تظهر ان المقتول مات منتحرا او ( سكته قلبيه ) .. بطلع انا بنتيجه كمشاهد وهي ( ان المقتول حي يرزق وان القاتل مات زمان نتيجه انفجار قداحه سجاير بصباحو )… وهذا الامر ينعكس علي كمشاهد من خلال تصرفاتي بالشارع .. بوقفني واحد وبقولي او بسألني شو رأيك بالاسعار .. بقولو او بجاوبو انو يا اخي انا رأي حسب تأثري بالندوات والحوارات انو ماده الرز والسكر موجوده بالبلد وبكثره وانو المواطن معاه مصاري يشتريهم بس المشكله انو سعر القهوه مرتفع وعليه انا مش قادر اكل مقلوبه فول لانو السكر بساهم بتحلايه الشاي اذا كانت ( المرميه مش موجوده ) .. جواب شافي ومقنع .. انا مش فاهم شو اللي بقولوا ولا الزلمه ولا حتى حدا .. بس هيك صار معي ..نتيجه تأثري بالندوات والحوارات التلفزيونيه اللي طلعوني منها المحاوريين ومقدم البرامج هيك فهموني او فهمت عليهم .. هيك طلع معي .. والله هيك .. شو اعمل .. قلبوا طاستي .. حتى قناعتي وفكري بالامور صارت مشوشه …لذلك وجدت نفسي حقيقة واقف على حياد .. ولا اتطلع الا ( لرزقة ولادي ورغيف الخبز وبس ) هذا اعلى سقف عندي وصلت الو واطمح فيه وبس .
هناك قوانيين كثيه طرحت واقرت ونوقشت بالبلد … ومنها قانون الانتخاب مثلا.. يا باي شو صار عليه حكي .. انا شخصيا اقتنعت بكل الافكار .. عمركم شفتو مواطن زيي .. انا مع الجميع والكل على حق .. هيك افهمت وهيك اقنعوني الجميع .. الي مع القانون واللي ضد القانون .. اقتنعت قناعه كامله بوجه نظر كل الاطراف بما يخص قانون الانتخاب … لذلك انا الان وشخصيا اذا حدا سألني شو رأيك بقانون الانتخاب بكون جوابي كما يلي .. ( قانون الانتخاب هو قانون عصري واصلاحي ويحقق العداله للجميع وبالتساوي ويمنح فرص للجميع للتنافس بعداله مطلقه وهو ليس بحاجه الى اي تعديل اكثر من هيك .. لكن القانون بحاجه الى تعديل جوهري ببعض بنوده مع الاخذ بعين الاعتبار باعاده النظر من ناحية التوزيع الديمغرافي والجغرافي للقانون ولا مانع من الاطلاع على نماذج اخرى من قوانيين الانتخاب لدول اخرى مثل السويد وبريطانيا واميركا واليمن والسعوديه ومصر وتركيا وبنغلادش … ) .. هيك افهمت من الجميع وهيك كانت الاراء مختلفه فانا اطلعت بهذا الانطباع … وبالاخر كل واحد بختم قولو بعباره ( انا مسؤول عن كلامي ) ..
لذلك قررت ما يلي .. ( انا لن انتخب نهائيا .. لكن زوجتي ساجعلها تنتخب صوت واحد على مستوى الدائره فقط وبس.. وابني ساجعله ينتخب على مستوى قائمه الوطن وبس .. وابني الاخر سأجعله ينتخب على مستوى الدائره والقائمه … وبنتي الاموره الصغيره بدي اخليها تعمللنا ابريق شاي بنعنع يوم الانتخابات وبس … واصواتنا الاخرى الغير مستغله بالانتخابات بدنا نستغلهم بالبيت ( بالتصريخ على بعض ) قبل ما ينتهي مفعولهم ) .
عجبكم … هذا التشويش اللي قاعد بحصل مع المواطنيين بكل القضايا .. بكل القضايا .. لذلك بعود وبرجع من جديد وبدور على ( رغيف الخبز ) وبس ومصر انو هذا اعلى سقف عندي ولن اتجاوزه .. واذا طار رغيف الخبز بنزل سقفي كمان اشوي وبصير ادور على اني ازرع قمح حتى اصنع منه رغيف خبز .. انا اعترف سقفي منخفض جدا وانا بمرحله نزول ولن اتطلع الى الاعلى .. لان ايماني بالله كبير هذا اولا.. وايماني ثانيا بالقياده الهاشميه .. وايماني ثالثا بالناس الطيبين بهذا البلد الطيب كبير .
ملاحظه : انا مسؤول عن كلامي … وهي مقالي بعرضو عليكم لاثباتصدق كلامي شايفينو . . والله سلط الكامير عليه هون خلي يبين على الشاشه.. خليه يشوفو الناس … فش حدا احسن من حدا .
والسلام عليكم
Burhan_jazi@yahoo.com

اظهر المزيد

مقالات ذات صلة

اترك رداً

زر الذهاب إلى الأعلى