رسالة من أم ثكلى “خنساء العقبة” توجع الأردنيين

#سواليف

نشرت الإعلامية #إيمان_العكور عبر صفحتها الشخصية في الفيسبوك ، رسالة من ” #أم_ثكلى ” من العقبة ، فقدت خمسة من أولادها ، أطلقت عليها لقب #خنساء_العقبة، وعلّقت على العكور على الرسالة فقالت :

كم هو مؤسف وجع هالأم المسكينة..وكم هو مخجل موقف كل نائب ومسؤول ما فكر يجبر بخاطرها ..ويسألها كيف عايشة وشو محتاجة.. فعلا شي مخجل..

وتاليا نص الرسالة التي أوجعت الأردنيين :

يمكن اغلبكم سمع عن #المأساة اللي أحلت بي قبل شهر بالتحديد..لما توفت بنتي الشابة فايزة اللي شفتها بتذبل قدام عيوني وما قدرت اخليها تبقى عايشة معنا..

وبعدها إبني اللي روحه معلقة فيها من شدة حبه وتعلقه باخته راح يدفنها وبطريق رجعته هاجمته امطار نادرة بالعقبة وجرفته معها واندفن بجنب اخته زي ما تمنى ..

تخيلوا أم تفقد ولادها الإثنين خلال ساعات.. اصلا انا احيانا بفكر حالي بكابوس..وراح اشوفهم باي لحظة داخلين البيت عندي..

اذا بتفكروا هاي هي بس مأساتي بالحياة ..بتكونوا غلطانين..

الحياة اخذت روحي على أجزاء..

وعلشان هيك سموني خنساء العقبة..؟

انا حتى الآن فقدت أربعة أولاد واختهم وهمه كلهم بربيع شبابهم ..

ابني الاول توفى بحادث سير 29 سنه

الابن الثاني كان مريض بضمور العضلات 25 سنه

الابن الثالث كمان مريض بضمور العضلات 27 سنه

والرابع اللي عمره كان 35 هو اللي توفي بعد دفن اخته بساعه غرقًا جراء السيول بتاريخ 28 /5 / 2023

وقبلها بسنوات ..فقدت زوجي واخوي واخو زوجي المريض اللي كان عايش معنا بالبيت..

روحي كانت بتموت شوي شوي..قلبي انكسر كثير ..وما عاد يتحمل اي وجع ..البيت صار موحش..لا حس لا صراخ ..لا ضجيج الا الصمت القاتل ..جدران البيت بحسها زي السجن ..انا على قيد الحياة..لكني ميتة.

حتى #الدموع ما عادت تشفي قلبي ..

يمكن تستغربوا ليش عم بكتب ..وليش بدي اشاركم وجعي ..كل إنسان عنده همومه واوجاعه..

لكن اسمحولي ..اسمحوا لقلب أم كبيرة بالسن انها تقلكم عن وجع ثاني ..ما اله دخل بالموت ..وجع النكران من مجتمعي اللي يمكن لو خفف عني بكلمات بسيطة كان قلبي ارتاح ولو للحظات..

اسمحوا لقلب أم سميتوها خنساء العقبة انه توجه رسالة وجع وقهر لكل نائب من نواب العقبة..لكل مسؤول هناك وللمجتمع المحلي اللي عرف عن مأساتها وما كلف حدا منهم نفسه بتقديم واجب العزاء او السؤال عنها اذا بعدها عايشة او ماتت..

الإنسان الوحيد اللي بحب اشكره على انسانيته هو رئيس سلطة اقليم العقبة معالي نايف الفايز ..لأنه الوحيد اللي حس بوضعي كأم..

كل الأردن سمعت وقرأت عن وفاة بنتي وغرق إبني اللي راح يدفنها بعد نص ساعة ..وين النخوة..وين الشهامة ..للأسف غير موجودة

وعلشان هيك ضيفوا على قائمة الأموات اللي فقدتهم بحياتي ..ضيفوا موت النخوة والشهامة ..؟؟

كلمتين هدول الك يما ..

إبني حبيبي .. يا فلذة كبدي .. عشت معي سنين جميلة..

ضميتك لصدري .. وقديش أرحت قلبك التعبان بين كفي ..

شفتك بتكبر قدام عيني يوم بعد يوم .. وتعلقت فيك وتعلقت بي .. وصرنا حكاية

نم قرير العين يما يا إبني .. نام بقبرك ولا تخاف ..

واذا داهمك ظلام القبر .. تذكر دفىء عناقنا ..

وإذا خفت من الوحدة أو الوحشة

فتذكر إيدي تمسك بايدك وتبوسها ..

أنت هون .. وأنا هناك ..

والأحلام وحدها راح تجمع أرواحنا ..

لا تخاف يما..في رب كبير

راح ياخذ حقي وحقكم..

صحيح..نسيت اقلك يما..

وراك ماتت كمان النخوة والشهامة ..

اظهر المزيد

مقالات ذات صلة

اترك رداً

زر الذهاب إلى الأعلى