ديمقراطي من برة

#ديمقراطي_من_برة

#أحمد_حسن_الزعبي

مقال الإثنين 22 / 5 / 2023

..قال بعبارة مختصرة: ” #الديمقراطية_المطلقة مش مليحة”..ابتسمت وقلت له: أيوه ..هاي نغمة جديدة..شو قصدك؟..قال: لازم يكون لكل #مجتمع لكل #شعب ،لكل أسرة ،لكل جغرافيا ديمقراطية بتختلف عن الديمقراطية الثانية..سألته: ممكن توضّح؟..قال :لازم تكون ديمقراطي من برة ، ديكتاتور من جوه، زي ثمرة “المس فلورا” ملس من برا ، خشن من جوّا..

أنا : مش فاهم ولا شي..

قال أبو يحيى: الديمقراطية ،بتفقد الأب #السلطة ، تفقده مركزيته وأهميته..أني بحب اكون ديمقراطي قدّام الناس لكني بنفس الوقت ما بدي أتنازل عن انفرادي بقراري ،وكلمتي حاب تظل تمشي غصبن عن الكل..

قلت: خلطة صعبة..

أبو يحيى: يعني ، اليوم بالدار بيسألوني عن الغدا ..قلت لهم :برياني..الاولاد بدهم منسف..منسف ولا برياني اختلفنا…قالوا تصويت..وأني بكره التصويت وبكره الانتخابات وبكرة النزاهة والشفافية والديمقرطية..الاولاد وأمهم صوتوا عالمنسف…وأني لحالي صوتت عالبرياني..

أنا : وبالتالي انت تغدّيت منسف غصبن عنك..

أبو يحيى: لا طبعاً..تغدينا برياني..

كيف: انقلبت على الأغلبية؟ ..

أبو يحيى: لا عندي بنت ميّالة الي وما بتطلع عن شوري وبنفس الوقت نباتية…قلت لها : يابا اعتبري حالك هيئة مستقلة و اشرفي ع #الانتخابات..وفعلاً ..أشرفت ع الفرز، الغت اصوات المنسف كلها لعدم استكمال #شروط_المليحية ..وفاز البرياني بمنتهى الشفافية والبهاراتية….يا أخي شو حلو تكون ديمقراطي وسلطوي بنفس الوقت..جربها ما رح تندم!

أحمد حسن الزعبي

ahmedalzoubi@hotmail.com

سواليف الإخباريwww.saealeif.com

اظهر المزيد

مقالات ذات صلة

اترك رداً

زر الذهاب إلى الأعلى