[review]
الأحد 3-7-2011
بعد دعوة الناشطة الكويتية سلوى المطيري بضرورة إيجاد قانون يسمح بشراء "ازواج حلوين" من الدول الاسلامية وبمواصفات خاصة أهمها الجمال و الطيبة والطاعة ليستطيع العيش مع المرأة الخليجية ذات الشخصية القوية..فإن ثمة تطور سيطرأ على مفهوم "القسمة والنصيب" بلا شك..
**
معارض متجاورة مثل معارض السيارات..يصطف فيه الرجال، بعد ان يخضعوا لعمليات غسيل يومي وتلميع و"سشوره" و"بولش" .. تأتي بعض النسوة "ليتنوّرن" بأسعار السوق…
· الزبونة: مرحبا…هاظ وارد وين؟!
· صاحب المعرض : هلا يا اختي..هاظا تركي ..
· الزبونة: شو فحصه..؟؟
· صاحب المعرض: كرت أبيض .. فحص كامل ..!!!
· الزبونة: شو طالب فيه…نهايته 22000!! مسجل مرخّص مأمن لسنة…
· الزبونة: نهايته؟
· صاحب المعرض : عالامانة عليّ بــ 21800…في أرخص اذا بدّك…هون كازخستاني تجميع ماليزي ..أبوه كزخي وأمه ماليزية بحسبلك نهايته ب16000…
· الزبونة: شو فحصه؟
· صاحب المعرض: 3 جيد..في دقة عالراس !!
· الزبونة: مجنّط؟..
· صاحب المعرض: مجنّط!! وفي فتحة بالظهر..
· الزبونة: شو بتحسب لي اياها؟
· صاحب المعرض : تكرمي بــ15500!!
· الزبونة: طيب هاظ؟
· صاحب المعرض: صيني ..بس ما بنصحك..من برّه فرجه..بس بنفعش ببلادنا…شوفي الفرق بين وقفته..ووقفته الشيشاني اللي هناك…!!
· الزبونة: صح فرق!!
· صاحب المعرض: انت بدّك مقنوة ولا تبدلي وتغيّري ؟؟؟
· الزبونة: لا، مقنوة طبعاً..
· صاحب المعرض: اذا مقنوة خذي من دول الاتحاد السوفياتي …وانا برأيي خذي التركي اللي شفتيه قبل شوي!!
· الزبونة: بس غالي ؟
· صاحب المعرض: عمي كل شي سعره فيه..يعني عدم المؤاخذة…بتوخذي اشي مضمون…!! وبريحك طول العمر..كمان كشخة…!!!
· الزبونة: في لبناني عندك؟
· صاحب المعرض: والله لا اخفيك ..قليل بالسوق!!
· الزبونة: ليش طيب؟
· صاحب المعرض: مصروفه عالي ..النسوان بدها اشي يوفّر عليها!!
· الزبونة: طيب الأردني ؟
· صاحب المعرض: ألأردني..ربنا الله ما عليه حكي…اقتصادي و شغل تشخيص..بس مشكلته زي "الفورد" … بعد السنة الأولى بدك تظلي تصلّحي:.سكري… ضغط..شبكية…عمدان توازن..قرنيات… أعطاله كثيرة..
· صاحب المعرض: اسمعي اذا مش مستعجلة..في هاليومين جايتنا دفعة منيحة بعدها بالحرة ما خلّصوا عليها!!
· الزبونة: اذا في اشي نظيف..فحص كامل 4 جيد احجز لي اياه… لو اغلبك
· صاحب المعرض: بأمرك ..شرفتي مدام.
*********
اذا اصبح لكل شيء قيمة شرائية فاعلم أن الدنيا لم تعد تساوي شيئاً..
غطيني يا كرمة العلي الدنيا تشقلبت!!
احمد حسن الزعبي
ahmedalzoubi@hotmail.com