جدتي ما بين السياسه والتنبؤات الجويّه
جدتي : ولك يا عوده كيف الجو بكره
انا : جدّه وحدي الله صدقيني اذا بجاوبك بسجنوني سنه وبدفع عشرين الف دينار غرامه
جدتي : يا جده شمسها مطروده اليوم ، والله شكلها شتّايه بكره !
انا : يا حجه مشان الله غيري الموضوع ، الشغله مش مزحه
جدتي : مين بده يسجنك يا خايب
انا : حجه الله يطول بعمرك الحكومه منعت انه حد يتنبأ بحالة الجو واللي بيفتح ثمه بكلمه عن الجو بدهم يسجنوه ويمسحو فيه الأرض
جدتي : بصلاة محمد صحيح ، بدي اقول يا جده اليوم كنت قاعد مع الحجة قطنه وكل ما اجيبلها سيرة الجو وانها السما محوده بتغيّر السيره
انا : ايوه يا حجّه بدي ياكي مثل الحجة قطنه ، كل ما حد يفتح سيرة الجو انتي غيري الموضوع واحكي عن اي شي الا عن الحاله الجويه
جدتي : يعني يا ولد اللي بحكي بالسياسه اهون من اللي بحكي بالمنخفضات .
انا : ايييوه بالزبط يا حجه ، الله يسعد قلبك ، الحمد لله انها وصلتك
جدتي : لعاد يا جده خليني احكي بالسياسه بلاش انسجن على تالي هالعمر ، هالسودا كونداليزا رايس وين ما الها بينه ؟
انا : كونداليزا الله يجبر عليها بتاخد حفنة دوا على الريق ، خليها بحالها الله يعين الناس
جدتي : ولك هو اردوغان من جيل عمك سليمان ؟
انا : والله ما بعرف حجه ، يمكن اكبر منه بسنه
جدتي : هي ولك صحيح شو صار بقضية الكردي
اه : ااااااه هيك بلشنا نزعل على بعض جده ، سيبينا من الكردي الله يسعدك
جدتي : يعني ارسيلي على بر ، احكي عن الكردي ولا عن الغيم ؟
انا : لا يا حجه احكي عن الغيم يستر على عرضك
جدتي : ول عليch من حياه ، حطلي مقطع المطر الأسود في عيني يتساقط زخاتٍ زحات لماجده الرومي وروح من وجهي .
عودة عياصرة
