الحكومة والاهتمام الزائد بالانتخابات
احنا مثل ما تعودنا دايما، انها الحكومة ما تعمل اشيء هيك لوجه الله، الا في وراها انّا او وراها مكسب او مصلحة، طيب يا جماعة هي الحكومة لويش فكركوا هالقد ذابحه حالها ومقطّعه حالها ومهتمة كثير بالبرلمان والانتخابات، وبتعمل دعايات، وتمثيليات، وبتوزع بوسترات ومناشير وبتعمل ندوات وبتحط لجان ومشرفين، وما بدري شو …… ؟؟ وما فيه شارع او دخله او زقّه الا وفيها بوستر دعايه للانتخابات، والله ما ظل غير الحكومة توزع مصاري على الناس او يوزعوا حلو عن المرشحين قد ما هي ميته على الانتخابات ….ومش ناقص غير يجيبوا كم شيخ مثل حمدي مراد ومن هم على شاكلته والاب نبيل حدا ,وكم بنت حلوة من تبعات الاعلام وهم ماسكين ادين بعض وقاعدين بضحكوا ومكيفين ومأشرين باصابعهم على عبارة مكتوبة بين قوسين ” انت صوّتت؟ احنا صوتنا ” !!
وطبعا هاي كلها بدها فتّ مصاري بالشوالات ، مش حايالله يعني ، وهم الله وكيلكو طرمونا قد ما قالوا انها الحكومة طفرانه وبتطحن على الديch والخزينة مفلسة وما فيها مصاري ؟
طيب لعاد ما دام ما فيش مصاري ولويش خيوه ما يوفروا هالمصاري كلها وهالتعب والغلبةوحمّة البال وهوشات الناس والطخ ويلغوا هالبرلمان من اصله، ويريحونا من هالقرف او يعيّنوهم تعيين احسن، ما دام اصلا كلهم بصّيمة وما منهم فايده ترجى وما حدا منهم بقدر يطلع منهم عن الخط المرسوم اله، وكله بالاخر ضحك على الذقون، خيوه وحط بالخرج، كما يقول احدهم !!
واني والله واعوذ بالله من كلمة اني ، انه يا اخوان قلبي ناقزني من هالقصة ، وعيني بترف من زمان زمان ما بدري ليش !!
لكن بقول اللهم اجعله خير يا رب،وتمشي الامر عكس ما مني مفكر ويخيب ظني كله ويطلعوا هالناس ملاح ملاح ما الهم مصلحة بنوب .
بس بتمنى من الجميع بالاخر ما نقطّع ونذبح بعض، وخلينا ريلاكس وهاديين وما نتعصب ونشد على حالنا كثير، لانه ما بتروح غير بكياسنا وفي رواية أٓخرى (بط****) ، مشان اشي بتحبه الحكومة والمرشحين على حد سواء ، واحنا مثل ما انتو عارفين ، كناخبين ما النا فيها لا ناقه ولا جمل، غير التعب وحمة البال والمباطحة على الفاضي الا لمصلحة الحكومة والمستنوبين المرشحين، !!
والله ولي “المرشحين والحكومة” معا واحنا البين يطسنا والله لا يردنا !!
