التهابات نيابية !!
تمر الايام مسرعة تجاه نهاية السباق الانتخابي لولادة مجلس نواب جديد لطمس حفنة جديدة مما تبقى من هوية و كرامة المواطن الاردني ..
زياد ؛ هو مواطن عابر في سبيل الشعارات الحراقة التي تغزو الشوارع لتزين يافطات مرشحي المجلس القادم ، تلك التي تحمل صورا اتعبت محترفي الفوتوشوب لضمان تبييض وجه المرشح و تحسين صورته قدر الامكان امام الشعب – على رأي احد نشطاء مواقع التواصل الاجتماعي .
زياد يتساءل عن جدوى الترشح للانتخابات و الجلوس تحت القبة و بذل الغالي و النفيس من سدور الكنافة و البقلاوة و الدعاية و الاعلان و “سواليف التشذب هاي ! ” يتساءل عن وضع احد المرشحين و هو مستشار في مؤسسة رفيعة المستوى ، و يتقاضى ما يزيد عن ال 5000 دينار شهريا عدا عن الامتيازات الاخرى ، كيف يمكن لعاقل ان يتخلى عن هذا الوضع و يستقيل من منصبه لغايات المقامرة بالترشح للمجلس ?!!
ابو عامر هو احد الاشخاص الذين رسمت الحياة على محيياهم ما رسمت ، و نقشت سنين الكفاح وسمها في جبينه المحترق ، كان يجلس بجوار زياد و يسترق السمع و ادلى بمداخلة بسيطة فقال : ” يا ابني بدورو عالحصانة بدهم يهربو مخدرات !!!”
ضحك زياد و سأله : ” من عقلك يا حج ?!” ، ابو عامر تبسم قائلا : ” يا ابني بفكروها شطارة ! تجرة عاطلة بس فيها مصاري ، فكرك قديش بطلعو بالتهريبة الوحدة ? قد شقى عمرك خمس سنين !! ”
زياد لم يقتنع : ” يا حج شو بتقول ?!! النائب بده يبيع حشيش ?!! ” ، ابو عامر : ” يا ابني الموضوع مش بالنوع الموضوع بالمبدأ ! مش شرط المخدرات تكون بودرة او حبوب ، يمكن تكون قطعة ارض او سيارة موديل السنة ! يمكن تكون ضريبة جديدة او حتى قانون عاق لهالبلد ، يا ابني ؛ خلص خربوها .. المضاد الحيوي لما يهاجم المرض بدري بكون مفعوله اقوى ، بس ما دام هالمريض عم ينازع شو نفع الدوا ?! يا ابني ؛ هالشعب من اولها ما دعس عرقبة الحرامي لانه ابن عم فلان و عشيرته كذا و بيننا نسب ؛ تا وصلت الناس لمرحلة مو فارقه معها الانتخابات كثير الاغلب ماخذها فزعة ! دوا السماط حقه 80 قرش و البلد بتمشي مفاحجة !! روح يابني شوفلك علم او شغل التهي فيه ، شوفلك وحدة حبها و كافح مشانها ، ساعد اهلك و ساعد الناس ، و اذا مصمم تشارك فانتخب بأمانة و بلاش تبيع صوتك ، عشان هالبلد مش عشانك ؛ هالبلد المرض فيها بحجم السماط للجسم مش اكثر ، فمش ناقصنا البكتيريا تزيد و الالتهاب يكبر ، والله بكرة البدلة اللي لابسينها لتوكل من جلدهم ، و العبي ليتكفنو فيها ، هاي الاشكال الى مزبلة التاريخ و الى اسفل درك في جهنم !! ”
#التهابات_نيابية
#الاردن_ينتحب
#Abu_Jawad