“يا رايحين ع العمره” / محمد عياش القرعان

“يا رايحين ع العمره”
بحب اقول للي بحبوا يروحوا عمره كثير، وبغلبوا حالهم وبغلبوا الناس معهم بمهرجانات الوداع والاستقبال، قبل ما تروح يا اخي حسّن اخلاقك وتعاملك مع الناس بالاول ، صير بني آدم ومحترم مع اللي وقف معك وساعدك واحترمك ولا عمره اساء الك !!..،،
العمره مش سياحه ولا طشّه ولا تغيير جو ولا مشان توخذ صور سيلفي وتورجينا حالك على الفيس بوك وانت لابس ملابس الاحرام وانت فايت وانت طالع وبكل الوضعيات، ولا مشان تجيب معك مسابح ومية زمزم ومساويك ودشاديش وطواقي صينيه، وكل دشداشه بشلن !!
وفرودة خرز والعاب للاولاد ،وتمر من المدينة المنورة ولا مشان تجيب هدايا ومراسم واحتفالات ووداع واستقبال ، وتقعد تحكي قصص عن رحلتك الجميله والمهيبه وكيف كانت مريحه ولا كانت متعبه، والسكن قريب ولا بعيد ولا الاجهزه الكهربائيه غاليه ولا رخيصه ولا كيف كنتو تطبخوا مع بعض، ولا تزيين عتبة البيت بالزهور والاضوية يوم ترجع حضرتك بالسلامه،
العمره يا حبيبي عباده وتقرب الى الله وتغيير سلوك واستغفار وانقطاع الى الله، العمره ان تستغفر ربك وتسامح من ظلمك وتعتذر عن خطئك واكلك حقوق الناس بالباطل واكلك للربا ومن ظلمت واسأت له،وتصلح حالك واخلاقك ،،وتحس انك رجعت مش مثل ما رحت ..تحس انه صار فيه تغيير حتى لو كان بسيط،،
اما انك تروح وترجع وانت بعدك على اخلاقك السيئة مع كل الناس ومع الاقربين ومع اللي احسنوا اليك ، فهاظا شيء عجيب !!!!

اظهر المزيد

مقالات ذات صلة

اترك رداً

زر الذهاب إلى الأعلى