رئيس وزراء النرويج يتنكر في زي سائق تاكسي ويقضي يومه في نقل المواطنين كي يستمع همومهم ومشاكلهم .
ولأنَّ دولة ابو زهير ” مطقّع للرئاسه ” ، استأجر تكسي في جبل عمان ليستمع الى هموم المواطنين ، ركبت في السياره وكلي أمل بأن اصل الى سوق الجمعه بأسرع وقت .
سائق التكسي : بلا مؤاخذه شو بتشتغل يا ابو الشباب
انا : فاتح محل خضره
سائق التكسي : موفيه معك ؟
انا : والله بتروج وما بتقع ، يعني سالكه بحذر هالحياه
سائق التكسي : يا اخي الحكومه كل يوم وهي رافعه الاسعار ، والله الواحد عاف حاله .
انا : خليها بالقلب يا خال ، كل خبز وسيبك من الحكومه
سائق التكسي : ول ايش مالك منكد ، افتحلي قلبك يا رجل
اخرجت علبة السجائر وأعطيت سائق التكسي سيجاره ثم قلت : يا عمي هالحكومه مبلشه بالشعب المسكين ضرايب ورفع اسعار وفوق هيك كل يوم بتطلع بقصه تنكد على هالمواطن
سائق التكسي : هو بيني وبينك رئيس وزراء متخبّط بقراراته وبحارب بالمواطن حرب
انا : شو دخل رئيس الوزراء ، الله يعينه يا رجل بكفي انه بسري من السبعه الصبح بهالبرد على رئاسة الوزراء
سائق التكسي : بقولو معه سكري معقول هالحكي
انا : شو سكري ، انا سمعت انه معه فقر دم وضغط وسكري وبدهم يعملوله عملية قلب مسطوح ، ابن خالي بشتغل ببلدية الزرقا حكالي انه بيشرب ” حفنة ” دوا بس يصحى من النوم
سائق التكسي : فال الله ولا فالك ، هيه مثل الحصان لا ترد على ابن خالك هاي كلها اشاعات .
انا : مش بس ابن خالي حكالي ، انته انتبهله بالتلفزيون كيف مش قادر يوقف على رجليه من الروماتيزم ، وعنده سوائل بالركبه وهشاشة عظام .
سائق التكسي : ولك خاف الله ، من وين بتجيب هالقصص .
اوصلني رئيس الوزراء الى سوق الجمعه ،اخرجت النقود من جيبي واعطيتهُ دينار ، ثم اردت النزول من المركبه فامسكني بيدي وقال خائفاً : جاهك بالله تحكيلي لو رئيس الوزراء قدامك شو بتحكيله
انا : بحكيله اتقي الله في المواطن ، اتقي الله في القسم الذي ادليت به ، سوفَ يسألك الله عن البنك المركزي والسوبرماركت والبسطه ، سوف يسألك الله عن حجارة القصور واوتاد الخيام ، سوفَ يسألك الله عن ولائم الوزراء وأمعاء الفقراء ، سوف تُسأل عن محتاجٍ في العقبه ويتيمٍ في السلط ومظلومٍ في جرش ، ستُسأل عن الشباب العاطل عن العمل ، سوفَ تُسأل عن ارتفاع نسبة الجرائم والبطاله ، حتى فنجان قهوتك في الصباح سيسألك عنهُ الله .
أزال سائق التكسي القناع واذا به رئيس الوزراء ، اخذ يبكي ويمسح على رأسي قائلاً : انا بعلن استقالتي من هاي الساعه بس قبل لأستقيل بدي اصل رئاسة الوزراء وأنزل سعر لتر البنزين تعريفه عشان ربنا يغفرلي ذنوبي .
بالزبط انته نزل البنزين تعريفه وراح ربنا يستبدل كل قراراتك حسنات .