مش معقول يصير معي هيك ..!
سأظل أقولها و أعيدها بملء الفم : نفسي أصير حرامي ..مُنى عمري أكون فاسداً كبيراً..يا ناس ؛ يا عالم ..يا سود ؛ يا بيض..يا قرود ؛ يا سعادين..مش معقول تمرّ الحياة دون أن أذوق طعم الفساد الذي أصنعه أنا ..! لا يقبلها أحد على شيباتي بأن يأتي الصغار الذين انولدوا بعدي بعشرين سنة و يصبح لهم ( هزّة و رزّة) لأنهم صاروا حرامية وأنا أرتع بكل هذا الشرف الذي أدفع ثمنه كلّ يوم..!
مش معقول لغاية الآن مش هابشلي ولا هبشة ..! مش معقول أقضي عمري بين الأحلام الصغيرة التي لا تتحقق ؛ أو بين أوراق اليانصيب التي لا تربح ..! مش معقول يصير مع واحد مثلي هيك ..! أروح أدوّر على ذهب يعني..؟ أروح أبحش وأبحبش ..؟! وأشتغل تالي العمر بفك الرصد و العلامات التي قدّام الموقع و أجيب شيخ و أودّي شيخ ..!!
ليش هيك يصير معي ..ليش..؟ حتى أن تحلم أن تصبح فاسداً محروم منها كمان ..؟! لهاي الدرجة درب الفاسدين و الحرميّة صعب ..؟! أنا مستعد آخذ أي دورة ..بس حققوا لي حلمي..أريد أن أصبح فاسداً ..وأول شروط الفساد ألاّ أرى نفسي فاسداً؛ ويا ويل إللي يكلمني..!
يا ترى أيهما أجمل : الفساد على جوع أم الحرمنة على شبع ..؟ نفسي أجرّب الثنتين يا أرفل ..وينك صحيح ..؟!
