مين قلك تسكن في الطابق السفلي يا قليل الفهم والحيا …. دير بالك تقول انه ما عندك مصاري تشتري فيلا ولا شقه على رأس هضبه أو رابيه مرتفعة ذات اطلاله ربيعيه ما بيجيها شتا ولا فيضان …
فعـــلا انـــك مــــا بتستحــي ولا عنـــــــــــدك ذوق ……..
وانت يا شفير – يا بجـــم يا لطــــخ – مين قلك تخش النفق ….اكيد ماعندك رخصه .. وحضرتك داخل النفق بسيارتك التعبانة …دير بالك تقول ما عندك مصاري تشتري 4X4 . وشوف كيف لا نفق ولا الشرطة بوقفوك …
فعـــلا انـــك مــــا بتستحــي ولا عنـــــــــــدك ذوق ……..
انا بحمل مسؤولية اللي ماتو في الفيضان الى ذوي المفقودين … اللي سكنوا بتسوية…
القوانين ما بتسمح حدا يسكن فيها وهم عصاة ومتمردين خالفو القوانين ..
كمان من حقك تدعس و تقتل اللي بقطع الشارع من غير المكان المخصص للعبور .. مهو خالف القوانين و عشان هيك دمه مهدور..
زي ما القوانين .. بتمنع البناء في الاراضي المستملكة من قبل الأمانة لأغراض المساحات الخضراء .. اسمعوا مني:: فيما اذا لا سمح الله بتموتوا في برجين الدوار السادس انتوا بس يا السكان المسؤولين . مهي الأمانة لا تسمح قوانينها …. كيف انبنت … الله اعلم………….
وكمان اللي ماتوا من تسونامي مين قلهم يسكنوا عالشط .
بعدين شو هالسقاعه والبراده ……..
الدنيا بتشتي . اقعد بدارك .. استمتع بالكستناء فوق الصوبه . اشوي جاج او لحمه او جمبري .. مع سحلب وصحن مهلبيه ورز بحليب و مسلسلات تركيه…اقعد ببيتك يا قليل الحيا والفهم .
فعـــلا انـــك مــــا بتستحــي ولا عنـــــــــــدك ذوق ……..
بالمقابل يا عمدة قريتنا. تلفون صغير لدائرة الارصاد الجوية او الإحصاءات العامة او البحوث الزراعية اللي في البقعه او الجمعية الملكية …. او جـــــوجــلهـــــا يا أخي … بتعطيك سجل هطول الامطار بالمللمترات لأخر خمسين سنه وبعطوك المعدل العام واعلى قيمه متطرفة وغيرها ….
على اساس جماعتك صمموا المناهل لاستيعاب 20 ملمتر في 24 ساعه …..
وحد الله يا رجل … العلم الي درسوه مهندسيك في الجامعات .. شو كان.. بطيخ و لا بيتنجان.. ماحدا بيعرف الف باء تصميم الطرق و الأنفاق والمياه والمجاري …..
عندك فكره عن عدد سكان عمان اللي ساكنين بتسويه… وكثافة الفرد لكل غرفه فيها – يعني كم نفر بكل متر مربع – مهو اعلى من عبدون وام اذينه ….. سكنوا فيها بحكم الفقر وقلة الحيلة والطبيعة الجغرافية لعمان اللي الطابق الارضي بيكون ارضي من جهه وبنفس الوقت هوه تسويه من جهة الشارع الثاني ….
و ما ببالغ اذا قلت: 30% واكثر من سكان عمان عايشين بتسويه .. يعني بطلعلهم أربعمائه الف مواطن ساكنين بتسويه …العصاة اللي ما بيفهموا … كان لازم في الشتوة يطلعوا على سطح العمارة حتى لا يحرجوا العمدة امام الاعلام اذا ما كان ساكن براكيه …..
بطلو لوم المسكين حتى في مصيبته .. و اللي بدفعه من ضريبه ميشان تعطوه خدمه مقابلها .. مهو راتبك بكسر الباء و راتبك بفتحها .. من جيبته و العزا عليه و المرمطه حلوان…
متى الله بدو يخلصنا من اللي ما بيستحوا ومن اللي ما عندهم ذوق ولا فهم .. ومين همه ؟؟؟؟ ..انتو بتعرفوهم احسن مني …..
فعـــلا انـــك مــــا بتستحــي ولا عنـــــــــــدك ذوق ……..
