شغلة بتمخول
في يوم من الأيام تأملت الأشياء الموجودة في منزلي وفي جميع المنازل , فوجدت يا طويلين العمر أن معظم الأشياء الموجودة ذات أشكال هندسية مثل المستطيل والمربع والمثلث والدائرة . واليكم بعض الأمثلة , الخزانة والأبواب وغيرها عبارة عن مستطيلات أما المربع مثل البلاط وأباريز الكهرباء ومخدات طقم الكنب , والمثلث نراه في قطع الجبنة الصفراء , علاقة الملابس , قطع البيتزا, وشبك الجلي .لكن ما لفت نظري أن غالبية الأشياء التي كنت أستعرضها كانت تمثل الدائرة واليكم الدليل بالأمثلة .
عُلبة بودرة الأطفال ,عُلبة دهون الصمات , صينية القهوة , عُلب البهارات , زجاجات العطر , مصارف الحمامات , رجلين الكراسي , عُلبة السمنة , عيون الغاز , كاسات المي , فناجين القهوة , صحون الطبيخ , مراية الحمام , عُلبة رش القارص , القروش والشلون والبرايز , سلة الزبالة ومش حاب أطول عليكوا . والباقي بتعرفوهن كلهن ما بدهن شطارة .
لكن إللي محيرني في دائرة ما لقيتهاش عندي بين أغراض الدار وإللي هي دائرة القرار , حاولت أقلب الدار فوقاني تحتاني تا ألاقي هالدائرة وما كنت ألاقيها حريقة الحُرسي . وبعد التمحيص والتفتيش والتنبيش استنتجت عدم وجودها لأنه هالدائرة مش سهل تتعامل معها بالبيت, لأنه ما بتعرف أولها من أخرها , ولا بتعرف من وين بدت ولا وين أنتهت , وكمان وين ما لمستها بتكون أصبت دائرة القرار , واللي بده يرسمها لازم تكون ايده خفيفة , واللي بده يمحيها لازم يكون لابس طاقية الإخفى .
لكن والله لغاية الأن إني محتار هي إسمها دائرة القرار … ولا القرار الدوار … أفيدوني
رائد عبدالرحمن حجازي
