خُذ اسرارهم من صغارهم
طلبة عروس
من اول النهار يتقلحص ساعة يلبس المزنوك البني المقلم وساعة يلبس العباة المقصبة ويغير كل شوي الشورة
لمحته كنته ..مالك يا عمي محتاس من الصبح كنك رايح تطلب عروس
جفل الحجي وشو عرفك اني رايح اطلب عروس
مبين بالك عمتي بتعرف انه بدك تتجوز عليها
شو اجوز ما اجوز اني فعلا رايح اطلب عروس لفرهود ابن ابو فرهود
فكرت والله
وراحت الكنه جابت قزازة ريحة ورشت على عباة عمها والله فكرت ما انتو الزلام بتسووها
وشد الحزام الحجي بده يطلع بالله يا عمي خذ معك هالصبي موتني من الصبح بدي اكمل ثمين هالغسيل وأطبخ لقمة مجدرة
وطلع الحجى معه ابن ابنه نط الولد وانه بظهر البكم
وصل الحجي واذا الجماعة جاهزين ووجوه الحارة الغربية والشرقية موجودين جلس في صدر المكان تنحنح ولفلف عباتة على وسطه قدّم واحد من اهل العروس حط قدامه فنجان قهوة
وقف الحجي وبلش يخطب دور عن العلاقات الأجتماعية دور عن النسب العتيق بينهم دور عن المدارس اللي بطلت تربي وعن جاهات النواب اللي بلا طعمه والناس كل واحد يبرطم لحاله ويطلّع بساعته زهقوا حالهم
فط الصبي ابن ابنه للحجي يا جدي السولافة ما بدها كل الحكي اصلا فرهود وفهمية مزبطين كلشي اني شايفهم تحت التينه السواديه وفرهود يشمشم فيها والريحه اللي امي حطتلك منها ريحه نسوان بشوف امي بتحطها على رقبتها لما ابوي يروح من الشغل
انعجق الحجي وقف ابو العروس اشربو قهوتكو ريتها صُبار بركة وعينه على الصبي بده يوكله
وفرهود صار وجهه متلون والصبي مثل قرن الفلفل ودارت المشاريب
حس الصبي انه مطلوب لأكثر من جهة امنية نط من بين الضيوف وانه خابط باللي يضيّف عصير ليمون وان الكاسات بحضن جده
لقطه العريس وما تمكن منه بورجيك
وفعط الصبي ونط على ظهر البكم
اول واحد طلع من الجاهه قال للصبي بدي اشوفك بكل الجاهات وين ما في طلبة عروس بتيجي مع جدك
